宣傳新歌險中肺炎 Jer@MIRROR長途跋涉拍MV撞傷頭見紅

Jer表示效果好辛苦都值得！

MIRROR成員柳應廷（Jer）早前因與確診新冠肺炎的ViuTV工作人員開會，搞到差點中招，好彩最後病毒檢測呈陰性。其實Jer最近頻頻返公司開工，因忙於宣傳第二首個人單曲《迴光物語》，為了拍該歌MV除了出動到花姐和隊友Anson Lo幫手，更差點遺失心愛戒指，甚至搞到頭頂撞傷見紅，但效果好辛苦都值得。Jer亦承認出單曲是很好鍛煉，最重要學習獨自承擔壓力。

Jer坦承推出個人歌曲，要獨自承擔壓力，最初覺得很困難。 

今年打算推出三首單曲的Jer，繼上次以水做主題的《水刑物語》，今次就用光去延續這個故事，「因為第一首歌都係有光嘅出現，呢個光係將我由水底拉返上水面，第二首歌係想講你上咗水面之後，呢個光唔見咗，你點樣喺黑暗環境行落去。第一首歌最尾都講到『茫茫宇宙某顆星斗』，咁不如第二首歌就講我跌落咗銀河系某個故事，又可以承上接下一個續集，觀眾聽起上嚟都可以聽埋第一首歌，好似當電視劇咁睇有故事性。」

Jer在鄰近邊境的蓮i麻坑礦洞為新歌MV取景，確實有種與世隔絕感覺。

Anson Lo在現場仲化身小助手，幫Jer吹風扇免他溶妝。

為了營造這種與世隔絕感覺，Jer特別前往鄰近邊境的蓮麻坑礦洞為MV取景，他好感動平日不做運動的花姐先陪他行足兩個鐘山路去睇景，之後隊友Anson Lo更親身陪他去拍攝。除在酷熱天氣警告下拍攝，令工作人員中暑外，Jer更差點連心愛的戒指都遺失，「最尾一幕係要掉燈代表打破自己框框，呢幕我唔小心掉咗隻戒指出去，係我自己好鍾意同好貴，搞到啲工作人員幫我喺個石灘度搵咗15分鐘，好彩搵得番。」

Jer講起拍MV飛甩戒指，他形容「嗰刻個心跳出嚟」。

最後，Jer更搞到見紅，「我喺第二個拍攝點行返出嚟差啲暈低，因為嗰度有個洞要經過，但洞口太低我撞到個頭好痛，返到屋企洗頭發覺原來擦損咗仲流血。」

3月時，Jer為宣傳歌曲《水刑物語》到尖沙嘴街頭busking，花姐提他要戴口罩。

 向來比較怕羞的Jer，認為推出單曲是很好鍛鍊，特別在抗壓方面，「一個人唔會有其他兄弟幫你分擔咁多批評，衰就自己承受晒，就係Jer你做得差，所以要做得更加好。」對自己唱歌要求高的Jer，更自爆演音樂劇《如果只得一分鐘》時失準，搞到在後台對着花姐喊，「當下我係唔開心，但係我要盡快調整自己心態，夜晚嗰場做得更加好。live表演就會有好多唔完美，你要接受嗰啲唔完美。」

前陣子前往英國舉行MIRROR巡唱的陳卓賢Ian，趁空檔時間於倫敦拍攝了最新單曲《Thank You Postman》的MV，當中的情節，正是上一首作品《Lost at first sight》的延續。

陳卓賢（Ian）推出新歌《Thank You Postman》。

《Thank You Postman》由Ian作曲，陳詠謙填詞，是二人繼2020年《正式開始》後再一次合作的作品，歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地，但心靈上依然形影不離，連繫一起，並憑藉寫給對方的信件聯繫感情，而郵差為這段感情扮演了重要角色。現在資訊科技發達，Ian現在都不會寫信了，但他回憶道：「我以前有寫過信，但寄就比較少，因為多數親手俾，我唔係一個好擅長用言語去表達自己嘅一個人，所以過去會選擇寫信。」雖然現在機會少了，但問到在英國巡唱時的Ian，若要寄出一封信，他選擇會寄給他的粉絲Hellosss，Ian說：「希望你哋都接收到呢封信，雖然我而家唔喺香港，但都收到你哋對我嘅支持，呢封信係回饋返呢份愛俾你哋。」

相關影片可以按以下畫面觀看：

影片連結：

Ian到英國巡唱趁機拍攝新歌MV。

歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地。

因為要到英國開Show，所以Ian出發前忽發奇想，他說：「既然一場嚟到，睇下會唔會安排到少少時間拍到MV一啲片段。今次呢隻歌同MV，係講男仔去咗第二個地方去追佢嘅夢想或者做佢要做嘅嘢，女主角唔係喺同一個地方，各自努力緊自己嘅嘢，其實某程度上大家好多嘢都係同步嘅。」剛好Ian身處英國，扮演女友的許恩怡Natalie在香港，二人各自分開拍攝，香港及倫敦穿插於MV畫面之中，直截了當表達了兩人分隔異地的關係。

Ian身處英國，扮演女友的許恩怡在香港，二人各自分開拍攝，直截了當表達了兩人分隔異地的關係。

由於在英國的行程緊密，Ian當日從香港飛抵倫敦，便立即投入MV拍攝，他坦言都有點吃力，他說：「第一次嚟倫敦，一落機就拍攝，因為Jet lag，都幾辛苦，呢種感覺令我諗返起當日拍攝《正式開始》MV，又係拍完劇就飛通宵機去日本，又係去到機場就即刻開始拍，係好攰，而家喚醒咗當時嘅記憶。」Ian更搞笑道：「唔得喇，好攰！我而家已經想瞓覺。」

難得身處異地，除了拍攝MV外，未知Ian可會在旅程中尋找創作靈感？他說：「又好少去尋找，有陣時係突然有啲嘢出咗嚟，多過主動去尋找。我搭飛機多數唔係好瞓到覺，所以反而係喺飛機上面，我都有寫到一首歌出嚟。」

情歌系列作品第二章。

今年這個音樂系列作品已來到第二章，被問到將會有多少個章節，Ian大賣關子道：「大家要密切留意，即係好似睇一套電影，譬如《哈利波特》，如果一早知道幾多集，就大概知道劇情點樣發展，但我想大家一路追一路期待會好啲。」想知劇情如何發展，大家都要繼續追聽下去了！

Ian欲寫信回饋粉絲愛意。