新片剷平頭演出獄江湖猛人 任賢齊鐵漢柔情拖老婆孭手袋

果然係「愛妻號」

第四波疫情再挫電影圈，業內不少人工作都大受影響，但54歲任賢齊（小齊）好好彩，於逆市下連接兩部電影，繼上月中拍竣新片《大Project》後，旋即再為馮志強執導的《失衡兇間：唐樓》開工。由於今次飾演一名出獄的江湖猛人，開拍前他也特意剷了平頭裝，加上留了一面鬚根，望落Man爆兼殺氣十足，不過，私下的小齊其實是一名「暖男」。日前趁放假，記者就撞到小齊拖實老婆陳則妤（Tina）去淺水灣買救生衣，其間他還不介意幫對方孭住個Chanel手袋，又扶實愛妻出出入入，認真Sweet到漏！

望落Man爆兼殺氣十足的小齊，其實是一名「暖男」，非常照顧老婆。

任賢齊與太太陳則妤從大學時代開始拍拖，至2002年才拉埋天窗，育有15歲大女Rati和12歲細仔Cody。入行30年與緋聞絕緣的他出名是「愛妻號」，即使跟Tina相愛多年仍經常被拍得拖手行街街，好似早前下午5時許，《頭條新聞》見任氏夫婦又撇低仔女去淺水灣拍拖。當日，全黑Look的小齊先陪老婆去運動舖睇救生衣，Tina拎起一件Sharp黃色款試上身，「廿四孝老公」熟練地接過Chanel手袋孭上膊，仲細心地彎腰替對方整理好件衫，惜逛了約15分鐘，最終都不啱心水沒有幫襯。

小齊和太太Tina日前撇甩仔女，快閃淺水灣拍拖行街。

Man爆的小齊會幫老婆孭手袋，還細心彎腰幫對方整理救生衣。

雖然相愛多年，但任氏夫婦依然好Sweet拖實手仔周圍去。

Tina舉起手機，以夕陽美景作Background與老公自拍。

小齊主動幫老婆拎咖啡、麵包之餘，還扶實對方落樓梯。

經過一間餐廳撞到熟人，小齊同老婆就停低跟店員吹水，非常親民。

全程逛了半小時，兩人才折返上七人車回家。

小齊早前跟鄭伊健為撐港片，有傳以7折價錢接拍電影《大Project》。

其後小齊又與吳海昕在6日內，火速拍畢由馮志強執導新作《失衡兇間：唐樓》。

自《樹大招風》後，小齊相隔4年再為電影《失衡兇間：唐樓》剃Skin Head！

小齊回台灣接受隔離期間，不時自稱「任媽媽」拍片騷廚藝。

之後，這對老夫老妻便手牽手行去Coffee Shop買咖啡、麵包，沿途見到日落美景，他們更駐足舉機玩自拍。當Tina在店內等嘢食時，工作繁忙的小齊就趁機在門外覆Message，但一見到老婆行出嚟，他即秒速收機上前幫手拎嘢，並化身「小齊子」扶實對方落一級樓梯。離開時，路經一間餐廳的二人又巧遇相熟的店員，兩公婆亦Nice爆停低跟對方吹了陣水，其間眾人更傾到哈哈大笑；落區玩足半個鐘，小齊先傍實太太上七人車返屋企。事隔數日，他又飛回台灣接受隔離，為將於明日（19日）在老家彰化舉行的祈福晚會演出作準備。

炎明熹一連三場演唱會圓滿結束！

一連三場《大家樂呈獻：炎明熹Gi-FORCE演唱會2024》，昨晚（4月14日）在九龍灣國際展貿中心舉行尾場，亦是去年十月因颱風關係，而取消的補場場次。是晚獲陳煒與丈夫陳國強、姜皓文、陳山聰與囝囝陳霆軒、李幸倪到場支持。

《炎明熹Gi-FORCE演唱會2024》來到尾場。

陳煒、陳山聰、姜皓文到場支持。

來到第三場，Gigi依然狀態大勇，又唱又跳表現落力，不過這晚的後空翻動作發生了一個小插曲，正當Gigi完成空翻動作落地時，可能用力太猛，最終Gigi被衛衣的帽「兜頭笠」，完全遮擋了視線，只見Gigi先露出既可愛又尷尬的笑容，之後秒速整理衣服繼續又跳又唱，緩解了這個蝦碌場面。

Gigi表演後空翻。

落地時可能用力太猛，最終Gigi被衛衣的帽「兜頭笠」。

除了唱自己的歌，當然少不了Gigi的「自選歌單」，當中有王菲的《守望麥田》、Serrini的《網絡安全隱患》、及陶喆的《流沙》等，Gigi笑指這張歌單由逾200首歌精心挑選，她又說：「大家知唔知呢場係補場呢？想問吓嗰時（取消）大家有冇失望？」台下即大叫「冇」，Gigi笑住讚歌迷思想正面。

Gigi笑指「自選歌單」由逾200首歌精心挑選。

在過去三場演唱會擔任Gigi音樂團隊成員的林智樂（Felix），來到尾場按捺不住，要在台上公開力讚Gigi，除了唱功了得，抗壓能力亦很強悍：「雖然有好多人讚佢，但有時都有啲好尖銳嘅留言，但佢都冇嘢，更重要係由我啱啱識佢到而家，佢個初心都冇變，對每個人都好好。有時記者朋友問我會唔會羨慕Gigi嘅事業，我覺得唔係羨唔羨慕，而係佢真係好值得擁有！」身旁的Gigi即感動表示，很少聽對方如此認真說話，並感謝對方為自己唱足三晚。

接着，Gigi獻唱《星語心願》，唱到最後那句「讓你知道我愛你」，台下即熱情回應「我都好愛你呀」。她表示小時候看電影《星願》，已經很喜歡電影的男主角，Gigi隨後唱出《對面的女孩看過來》，任賢齊（小齊）此時突然現身合唱，讓樂迷大為驚喜，更全場大合唱為演唱會掀起高潮。唱畢，Gigi說：「畀啲掌聲任前輩。」小齊謙虛感謝Gigi畀機會自己做嘉賓：「 因為我成間公司所有同事都好鍾意Gigi。噚日我喺新加坡做完演唱會返嚟，我啲夥計全部唔見晒，個個都嚟睇你，仲要一張飛都冇留畀我！同事們，聽住，聽日返工唔使咁早，好好享受今晚Gigi嘅演唱會。」他又笑謂Gigi與自己的女兒同一年出世，小齊搞笑說：「人多嘅時候叫我小齊哥，唔好叫Uncle呀。」

任賢齊驚喜現身。

小齊謙虛感謝Gigi畀機會自己做嘉賓。

之後，Gigi送上繡有小齊名字的水樽：「我知你5月份開巡迴演唱會，所以我揀咗呢個，識自己煲水嘅水樽，呢個可以直接煲水，非常方便，我都繡咗你個名喺度。」小齊自嘲年輕的時候仍會飲凍飲：「漸漸就用咗暖水壺啦，好多謝你。我真係成間公司都講，佢係未來嘅天后，希望大家都畀多啲機會Gigi。」最後小齊再為樂迷送上《我是一隻魚》，全場跟著和唱。

小齊讚Gigi是未來的天后。

除了嘉賓夠份量，這晚的驚喜同樣一浪接一浪，開騷前大批歌迷要求Gigi唱出MV在YouTube短短4天破百萬點擊的新歌《還有一艘救生艙》，收到大家的訴求後，Gigi特意於補場上送予歌迷，但卻一時感觸唱到喊，幾乎大半首歌要台下歌迷代唱，Gigi說：「我覺得我又代入咗首歌裡面，但唔係愛情，今日係最後一場演唱會，即係今日係最後嘅一次，然後大家要遠離我嘅感覺。點解今晚先揀呢首歌嚟唱？因為我想送呢首歌畀補場嘅大家，但係我真係冇用，成首都唱唔到，要大家幫我，我下次會唱好佢㗎。」台下再次大叫「加油」，為哭成淚人的Gigi打氣。

Gigi特意獻唱新歌《還有一艘救生艙》給予今場補場的歌迷。

感觸落淚。

Encore部份，Gigi特別為尾場的樂迷獻唱《你是你本身的傳奇》，坦言台下每位歌迷都是一個傳奇，一起成就了她的歌手夢，Gigi再一次落淚，對於這個人生第一個演唱會舞台、還有台下的觀眾，充滿不捨之情；唱到演唱會最後一首歌《Only For Me》，Gigi叫大家高舉手機燈和唱，望向這遍燈海，Gigi的淚水再一次滑落，令《大家樂呈獻：炎明熹Gi-FORCE演唱會2024》，在淚水與不捨之情下，感動落幕。

全場大合照。