沉迷賭博隨時可導致家破人亡，有網民在網上討論區發文，指父親濫藥在家昏迷被發現後送院，之後揭發他借了財務公司高息貸款去賭外圍，嚇得她四處張羅，終於為父親還了5萬多元的賭債，並警戒其他過來人。
這位「親子王國」網民發文指，她父親4日前，因為在家無所事事睡不着再次濫服安眠藥，「在家嘔白泡，跟住暈低，好彩我媽已退休無返工，在家中，可以及時call白車，呢啲事情，一年內發生三次，所以我哋都有哂經驗」。
網民為父親還清了5萬元的貸款。討論區「親子王國」網民圖片
更驚嚇的不止如此，「最令我晴天霹靂嘅就係我摷我老竇櫃桶，竟然畀我發現佢借咗財仔」。爸爸借5萬元分36期還，利息49000元，連本帶利9萬多元，每一期還2600多元，「佢根本就冇能力償還，佢都冇收入，條數都係我揹上身㗎，我會一次過還咗佢先，因為我無呢方面的經驗，我唔係好識計條數」。她於是向網民求助。
資料圖片
她大嘆，「我老竇爛賭呀，賭外圍啊衰到咁呀啲人，佢自己嗰10幾萬積蓄，喺馬會嗰度已經輸晒啦，跟住無錢咪學人賭外圍，搏鹹魚翻生呀嘛。」她指，「我又好驚佢遲吓借黑財，因為佢呢個人好蠢嘅，佢就係喺網上面嗰啲WhatsApp群組成日add人哋入組嘅呢，就係咁樣俾人哋昆咗入局去到外圍啊」。她擔心，「我唔知我老竇喺出邊仲有冇爭街數...同埋我最驚佢繼續有第二次第三次...我寧願佢爭我錢，起碼我唔會逼死佢呀嘛，佢爭出邊錢，人哋真係會劈瓜佢㗎！」
資料圖片
網民昨日再更新情況，指已經還了錢，一共是50,910元，「頭先我亦都同我阿媽講咗，如果佢有第二次嘅，我做女嘅會同佢斷絕關係，我唔會理佢，你要撐佢嘅你就自己撐啦」，「因為我老竇，有個爛鬼菜檔租咗畀人嘅，就收租$5000。咁我就同阿媽講，叫佢以後個租客直接過戶畀我，跟住然後我再分發返零用錢畀佢洗，總之就要佢負返個責任啦」。
不少網民都表達同情，「希望妳爸爸體諒妳同屋企人，早日戒賭。」有人提醒「外圍好多時會氹人篤手指，到條數有翻咁上下就連本加利追，到時就麻煩啦，所以真係要留意多啲」；也有人認為「破產咪得囉！做乜要幫佢還？」、「你幫佢還完下次又再借咁會唔會沒完沒了」、「正正因為佢係你老竇，更不能幫佢孭賭債。孭咗第一次，就無完結一日。而且只會越借越多，直至你全家都孭唔起。你去搵戒賭中心傾吓先啦。」
帖文轉載自《我真係好晴天霹靂》
網民父親輸光十幾萬後還借錢去賭博回本。示意圖片