《施政報告》前日出爐，提出要設立文化體育及旅遊局，將現行隸屬民政事務局的文化事務和商經局的創意產業和旅遊，加埋體育一齊大搞。體育學院主席林大輝同盧駿傾開偈，就話如果獨立設立「體育發展局」更加好。
資料圖片
林大輝解釋，體育、文化與旅遊，其實無大關係，如果想搞產業化，體育、文化同年輕人關係更大，甚至與教育都有連繫，在體育方面製造運動服飾用品、搞體育活動都可以做產業，但同旅遊無直接大關係，依家最多係有海外人士專程來港睇國際七人欖球賽。
資料圖片
所以，林大輝贊成未來獨立設體育發展局，如果怕新局範疇唔夠闊，他個人認為喺民政局轄下增設體育發展署都得，即係由D8常秘或D6級嘅官專責去搞，甚至乎成立文化體育局亦得，唔使加旅遊，質疑唔通「三合一」就等於可以做到產業化？
資料圖片
如果未來設新局，就要搵局長，真係「三合一」嘅話，林大輝笑言，要搵個人熟識體育、文化，仲要識旅遊，仲唔係文武全才？唔止，此人更加要識做生意，唔係點搞產業，咁又搵唔搵到呢個人？真係要問問政府先知。
林大輝贊成未來獨立設體育發展局。