11月24日，天氣乾燥，早上清涼，早上多雲，日間漸轉天晴。隔晚美股個別發展，道指跟標指分別升195點及7點；納指則連跌兩日，跌79點。債息上漲短線不利科技股表現，不過未來五至十年，科技股上升趨勢料可持續，主要係多項因素均支撐科技股上升，包括被視為鴿派嘅鮑威爾連任，為市場帶嚟穩定性，科技股短線調整，反而係收集機會，不過古天后所講嘅，只適用於美股。
相反港股嘅科技股一蹶不振，ATMX四大巨頭近日走勢疲弱，尤其阿里巴巴(09988)業績前後未好過，股價繼續向下尋底，可以話係撈邊個位，暫時都係喊得一句句。雖然市場憧憬內地監管已屆尾聲，事實上，阿爺對於重磅科技股監管未有放鬆，反而千方百計向相關企業苛徵重稅，以配合其共同富裕大方針。古天后講O左好耐，重磅科技股只有波幅而難有波幅，尤其阿里沒有最低，只有更低，股價不斷破底，尋底之旅未完之前，暫未宜撈底。
噚日輪到小米(01810)派成績表，雖然截至2021年9月30日止3個月股東應佔利潤7.92億元人民幣(下同)，按年減少83.76%，不過整體業績實際仍略優於預期，其中IoT與生活消費產品業務收入達到209億元，按年增長15.5%；互聯網服務收入達到73億元，再創單季度歷史新高，按年增長27.1%。雖然受供應鏈影響，但2021年第三季度，集團的全球智能手機出貨量仍達到4,390萬台。期內智能手機業務收入達到478億元，毛利率12.8%，按年增長4.4個百分點。至於小米嘅智能電動汽車業務順利推進，團隊成員已超過500人，智能電動汽車預計將於2024年上半年正式量產。呢份業績都算係咁，即使未能刺激股價向上，但以現價接近20港元水平計算，呢份業績令現價估值相對合理，20港元水平料有支持。
雖然暫時未見有乜嘢消息可支持大市向上，但亦未見有乜嘢重大利淡消息令大市要繼續向下，呢個幾星期，恒指由25800水平回落至24500水平，短線調整差不多接近尾聲，料恒指喺24400點有不俗支持，只係24200至24500為指數牛證重貨區，大戶會否手起刀落再劏牛，要睇幾件指數重磅股何去何從，雖然科技重磅股走勢強差人意，但喺息率趨升下，對金融股有一定支持，只要友邦(01299)跟大笨象(00005)仍頂得幾吓頭鎚，港股走勢都係咁上下，又不致太過悲觀。
古天后
(徐狄怡，證監會持牌人)
