商台女名嘴被炒，媒體大篇幅關注，有行外人問，唔係好明，一間公司炒個人，點解新聞日日講，佢係咩人嚟架？
李小姐係咩人? 佢做錯咩？
十幾年前入行，見到呢位阿姐，好辣，好chur，同官員政界好熟，當時甚至覺得佢有啲諗法都幾建制，都好識氹人，但有時好天真，但睇佢報道，真係不能不寫個服字，明明大家同一個記者會聽咁多，點解第二日睇報紙實係多啲料。
之後，輾轉聽到佢開咪，日日進步終為城中女名嘴，由於工作時間關係，甚少有空聽到電台 phone-in節目，但從行家口中相傳，雖然李小姐不是易相處的人，但官員對佢還是既怕且敬的。
早一段時間，終於與李小姐相遇一個飯局，講真，佢仲係咁寸，沒有將我等小輩放在眼中，但那種自信、瀟灑、口才，仲係令人羨慕多於反感。
被炒那晚，在公司等佢的回應，見到電視播出，職員將強行清理的物品送到佢家樓下，仲要喺近年最凍的二月夜裡，淒風冷雨，睇佢對守候的記者講話，一度硬咽形容事出突然，需要時間整理，稍後再交代，雖然情緒平靜，但明顯雙眼通紅。
突然，那股對佢少少由羨生忌的感覺都冇埋，從前那個自信、泰然、好辣的前輩，都要時間令自己平靜吓先。一間大氣電波的廣播機構，點解要咁狠呢，坦白說，電台名嘴有幾多個呢，一個主持人要付出多少努力和辛勞先成為一個名嘴呢，正如李小姐話齋，佢做錯咩呢？
令人感動的係，在即晚支持佢的燭光晚會中，有一位撐佢的人不是見慣見熟的政治人物，而係易小玲，一個弱質女流，剛做好重整下顎手術，跑來支持。眼泛淚光地發言感謝李小姐，為人質事件傷者同死者家屬出聲，並掦言以後沒有李小姐，以後不會再接受商台訪問。
李小姐應該感到安慰和驕傲，你老闆同埋視你為眼中釘的人，睇唔到你的付出和努力，唔緊要，果啲人根本在你生命中不值關注，易小玲此類普通民眾的真情表達，先係你值得回味的足跡。
話鋒尖銳、切中時弊唔係做傳媒人一個天職咩，點解當日公司覺得佢的風格有迴響﹐今日會變成死罪呢？正如佢拍擋黃小姐咁講，要將李小姐調傍晚做節目，希望佢哋上下夾攻，提高收聽率，呢啲要求做到喇，而換來的係立時被炒呢？
聽到李小姐在記者會上指前上司對佢那種吹毛求疵的挑剔，相信還在挨騾仔的人都好有同感，好明顯當老細想你走時，咩借口咩手段都會出，商台無論如何要認認真真俾一個交代李小姐，更希望李小姐堅持發揮監察政府的作用，為民喉舌。
鑊鏟
鑊鏟
** 博客文章文責自負,不代表本公司立場 **
