組合牛年出乎意料好成績 MIRROR三子望虎年齊出埠

集氣！

MIRROR隊長Lokman首次擔正劇集《IT狗》剛推出，仲拍住兄弟Frankie（皮皮）和Stanley（大表哥）一齊，他們直言日日開心玩到癲。對於牛年MIRROR成績咁好，Lokman用出乎意料來形容，但大表哥坦承壓力也愈來愈大，最怕令鏡粉們失望。展望虎年，3子除了個人心願外，最恨MIRROR兄弟齊腳開工，當然疫情下更希望大家可以一齊出埠拍嘢，諗起都開心，難怪Lokman講完都忍唔住話：「講咗3年啦！」鏡粉們齊齊幫手集氣啦！

3子最想拍新一季《MIRROR Go》，又可齊出埠玩。

講到拍《IT狗》過程，3子都話戲裏戲外都咁好笑。

Lokman同兄弟拍劇似開Party，「平時做騷都係一個月幾次，拍劇就一個禮拜見幾次，同埋拍喜劇氣氛好好，開親工都係開心，Party feel多啲，雖然有時會開好早，但都會少咗『唉吔，好早呀』呢啲。」皮皮指劇本搞笑，齋睇都會笑出聲，「其實個劇本上好多生活嘅元素好笑，我睇劇本都會睇到笑。」大表哥謂拍喜劇一定要玩先至會有火花，「喜劇有時就係玩緊嘅情況下，撞到啲好笑嘢出嚟。」Lokman拍住凌文龍和岑珈其就最易笑唔停，「同小龍一齊撞啲嘢出嚟，有時真係笑到肚痛，透唔到氣，要講『對唔住，畀我哋笑多10秒先』，再即刻收番。同珈其都多火花，佢又好多故事share唔會悶。」

《IT狗》劇照

《IT狗》劇照

《IT狗》劇照

談到去年MIRROR發展順利，在兩大頒獎禮都有好成績，Lokman坦言有點出乎意料，「咁講好似唔係咁好，但真係keep住有啲新衝擊新火花，呢個浪冚過嚟好似好大，原來嚟緊個浪可以仲大，呢啲驚喜同衝擊，呢年係充斥住呢個狀態。」不過大表哥坦承成績愈好壓力愈大，「每次拎獎，好多人覺得我哋成績好好，拎好多獎，我哋開心嘅另一面，真係多添咗好多壓力，好驚會做得唔夠好，會辜負咗大家嘅喜愛同期望，我哋要做好多好好嘅作品，演好啲戲，跳好啲舞，跳齊啲，唱好啲歌，去話畀大家聽，唔好辜負咗大家嘅期望同喜愛。」Lokman補充，「我哋想證明我哋好熱愛呢樣嘢，好肯花時間同心機喺呢樣嘢上一面。」

MIRROR及成員個人在商台《叱咤》共奪得8個獎。

當紅的同時，MIRROR成員的私生活亦成為焦點，但3子認為壓力未算太大，Lokman笑說：「大家想關注我哋私生活都係人之常情。」大表哥說：「我哋都會想知荷里活明星啲私生活啦！」Lokman續說：「但有冇壓力一定有嘅，行出街食餐飯都多人關注咗，不過趁呢個機會呼籲吓大家，如果想同我哋傾吓偈或者影張相，不防過嚟當面同我哋講一聲會好啲，反而壓力係你唔同我哋講，但係又投放啲能量畀我哋，會望住我哋咁，大方同我哋打聲招呼會好啲。」私生活變透明早習慣，大表哥覺得要更注意言行，「出道時花姐都提醒咗我哋，睇清楚自己言行舉止，好怕我哋行為會影響到其他人。」

在新城《勁爆》，MIRROR及成員個人共得9個獎。

講到虎年願望，Lokman說：「想疫情快啲完，可以除口罩去旅行，我最近好想入戲院睇戲，一路食爆谷，好耐冇試過啦！」皮皮都認同，「飲杯嘢都好呀！」至於MIRROR方面，Lokman希望今年有project一齊做，「又可以成日見，可以依靠住大家，有啲掛住嗰個力量，最好當然係旅遊節目，大家一齊出街食好嘢，都講咗3年啦！」皮皮就想新一年向演員路進發，「希望穩定返自己方向，好多fans問我『想去邊個位』，其實慢慢捉到演戲都幾玩喎！睇吓可唔可以試到呢個方向。對MIRROR嘅願望好奢侈，想多啲工作一齊做！但我控制唔到啲schedule！」大表哥即話：「寶姐聽到啦！」

Lokman新年願望看似簡單，但入戲院食爆谷暫時都幾難。

皮皮想行演員路，「皮寶寶」（粉絲專屬名稱）撐硬啦！

大表哥就覺得疫情下最緊要大家都健康，「經過呢兩年健康最重要，至於我哋就希望做多啲唔同嘅嘢，大家滿意我哋嘅作品，期望愈大都怕大家失望，希望大家努力可以做得好啲。」至於講了多時12子齊拍劇，3子坦言有難度，Lokman說：「呢個係To Do List入面，幾時Do到就未知。」大表哥說：「個劇每一個都係主線，我諗要60集嗰啲先得。」皮皮無奈又話：「啲期又唔知點樣度。」

大表哥新年除了想搵錢，最希望大家都身體健康。

當日訪問，3子粉絲都有送上食美為偶像打氣。

前陣子前往英國舉行MIRROR巡唱的陳卓賢Ian，趁空檔時間於倫敦拍攝了最新單曲《Thank You Postman》的MV，當中的情節，正是上一首作品《Lost at first sight》的延續。

陳卓賢（Ian）推出新歌《Thank You Postman》。

《Thank You Postman》由Ian作曲，陳詠謙填詞，是二人繼2020年《正式開始》後再一次合作的作品，歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地，但心靈上依然形影不離，連繫一起，並憑藉寫給對方的信件聯繫感情，而郵差為這段感情扮演了重要角色。現在資訊科技發達，Ian現在都不會寫信了，但他回憶道：「我以前有寫過信，但寄就比較少，因為多數親手俾，我唔係一個好擅長用言語去表達自己嘅一個人，所以過去會選擇寫信。」雖然現在機會少了，但問到在英國巡唱時的Ian，若要寄出一封信，他選擇會寄給他的粉絲Hellosss，Ian說：「希望你哋都接收到呢封信，雖然我而家唔喺香港，但都收到你哋對我嘅支持，呢封信係回饋返呢份愛俾你哋。」

相關影片可以按以下畫面觀看：

影片連結：

Ian到英國巡唱趁機拍攝新歌MV。

歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地。

因為要到英國開Show，所以Ian出發前忽發奇想，他說：「既然一場嚟到，睇下會唔會安排到少少時間拍到MV一啲片段。今次呢隻歌同MV，係講男仔去咗第二個地方去追佢嘅夢想或者做佢要做嘅嘢，女主角唔係喺同一個地方，各自努力緊自己嘅嘢，其實某程度上大家好多嘢都係同步嘅。」剛好Ian身處英國，扮演女友的許恩怡Natalie在香港，二人各自分開拍攝，香港及倫敦穿插於MV畫面之中，直截了當表達了兩人分隔異地的關係。

Ian身處英國，扮演女友的許恩怡在香港，二人各自分開拍攝，直截了當表達了兩人分隔異地的關係。

由於在英國的行程緊密，Ian當日從香港飛抵倫敦，便立即投入MV拍攝，他坦言都有點吃力，他說：「第一次嚟倫敦，一落機就拍攝，因為Jet lag，都幾辛苦，呢種感覺令我諗返起當日拍攝《正式開始》MV，又係拍完劇就飛通宵機去日本，又係去到機場就即刻開始拍，係好攰，而家喚醒咗當時嘅記憶。」Ian更搞笑道：「唔得喇，好攰！我而家已經想瞓覺。」

難得身處異地，除了拍攝MV外，未知Ian可會在旅程中尋找創作靈感？他說：「又好少去尋找，有陣時係突然有啲嘢出咗嚟，多過主動去尋找。我搭飛機多數唔係好瞓到覺，所以反而係喺飛機上面，我都有寫到一首歌出嚟。」

情歌系列作品第二章。

今年這個音樂系列作品已來到第二章，被問到將會有多少個章節，Ian大賣關子道：「大家要密切留意，即係好似睇一套電影，譬如《哈利波特》，如果一早知道幾多集，就大概知道劇情點樣發展，但我想大家一路追一路期待會好啲。」想知劇情如何發展，大家都要繼續追聽下去了！

Ian欲寫信回饋粉絲愛意。