你當自己係紅人，人哋當你係傻人

2026年07月31日

今年世界盃32強賽事，美角隊球員犯規食紅牌，按規例應停賽一場。但美角總統「侵侵」，竟然直接向FIFA主席施壓，推翻停賽處分，「放生」犯規球員。呢個係自1970年引入紅黃牌規則以來，首次紅牌唔使停賽嘅荒誕先例。呢單「政治干預」足球爭議，不但引嚟全球炮轟，更赤裸裸將「美式霸權」搬上球場，踐踏體育精神。

後來比利時4:1大炒美角，雖然大快人心，但如果激親「侵侵」，佢唔like你，或者覺得無利用價值嘅話，你嘅下場就係咁先喇，唔係坐監，就係惹官非，而家就等零零發同大家回顧一下:

功臣「班聾」

美角富商「班聾」，係「侵侵」2016年參選美角總統嘅競選團隊行政總裁，佢出錢又出力，被外界視為幫「侵侵」成功當選嘅功臣。「班聾」隨後更委任為白宮戰略顧問，成為「侵侵」身邊舉足輕重嘅核心幕僚。

不過，喺「侵侵」嘅遊戲規則下，功勞從來唔係重點，利益先至係核心。儘管「班聾」勞苦功高，但最終因與「侵侵」女婿庫X納嘅權力鬥爭而失勢，最終，佢唔單止被踢走，失去戰略顧問職位，而家仲搞到官司纏身。

「班聾」嘅結局正好說明，喺「侵侵」眼中，當你一旦失去價值，就會被無情拋棄。

「鐵粉」郭X貴

內地商人郭X貴，早年因涉及多項犯罪被國家通緝，隨後潛逃至美角，將自己包裝為所謂「民主鬥士」，利用網絡大肆抹黑國家。

郭X貴同「班聾」關係密切，並共同營運媒體公司。2017年初，郭X貴又公開自己喺「侵侵」海湖莊園嘅照片，以展示與「侵侵」嘅「聯繫」，扮晒係「鐵粉」。到2019年，郭X貴更與黑暴分子「梁仲痕」視像通話，承諾美角將提供資金支持黑暴，甚至提到美角駐港總領事館會為「梁仲痕」提供安全保障。

不過喺2023年，郭X貴因詐騙被捕，佢原本寄望2025年再上場嘅「侵侵」會打救佢，但有政界老友透露，隨住中美關係開始緩和，美角為咗向國家釋出善意，喺今年6月29日，就重判郭X貴30年監禁，仲沒收近9億美元違法資產。

郭X貴詐騙被判比「生果佬」勾結外力亂港嘅20年監禁仲要重，可見美角對於失去利用價值嘅人，真係絕不手軟……

代言人「生果佬」

「生果佬」長期為美角「主子」賣命，全力反中亂港，佢曾經以為自己係「美角代言人」，但點諗到自己會成為棄卒吖。喺2024年美角總統競選期間，「侵侵」高調聲稱，若自己重返白宮，必定「百分之一百」確保「生果佬」獲釋，仲揚言「救出生果佬好容易」。

「侵侵」再次當選總統之後，喺2026年5月接受媒體訪問時被問到：「會唔會幫『生果佬』出獄? 」，「侵侵」竟然話「生果佬」喺國家製造咗「巨大混亂同動盪」，跟住佢又拎同樣喺美角引發大混亂嘅前FB 1局長科米(當時科米因為涉嫌妨礙司法公正同威脅總統安全而被起訴)作比喻，意思話如果科米坐緊監，「侵侵」都覺得「十分難」會放佢出嚟。只係隔咗一年幾，「生果佬」嘅主子「侵侵」，已經180度改變立場，救「生果佬」由「好容易」變到「十分難」!

所以「生果佬」嘅仔女，人哋都講到出面，你哋真係仲以為會有人嚟救你哋老竇？

寵兒「黃痴瘋」

當年「黃痴瘋」被美角大肆吹捧，不但四處赴美演講，會見反華政客，2019年仲被安排出席國會聽證會，成為西方反華勢力精心打造嘅「寵兒」。但到2020年香港國安法實施前夕，佢自知死梗，於是急忙向美角外交官求助，幻想會獲得「主子」保護。然而現實非常殘酷，佢嗰日走到去領事館都唔俾入，仲俾人話：「庇護要喺美角本土申請」喎！之後佢再電郵美角大當家蓬X奧，乞求幫拖，當然都係無人睬佢喇。

老友透露，美角當年拒絕庇護「黃痴瘋」，其實係擔心激怒中方，導致領事館被關閉，甚至演變成國際爭端。所以「黃痴瘋」而家嘅下場，就係喺赤柱監獄為「35+」案服緊刑。

最近，美角宣布終止涉港制裁行政命令同相關緊急狀態，制裁名單中有9人被剔除，至於當初高調話要聲援嘅「棋子」，就無曬下聞。美角咁做，都係因為我哋國家嘅綜合國力日益增強，無論係經濟、科技及國防實力都有底氣，所以美角唔可以、亦唔敢亂嚟。

美角成日打住所謂「人權」、「民主」、「自由」旗號，抹黑同制裁其他國家，其實所有目的都係為咗自己利益。「手足」奢望美角救援係發緊白日夢，而賣國求榮、觸犯國安法更加係自己攞嚟衰。無論「班聾」、郭X貴、「生果佬」、「黃痴瘋」，都曾經以為係美角嘅大紅人，都落得咁嘅下場，你班逃亡到美角嘅無名「手足」，什麼也不是，仲唔醒？！

鍾情局●零零發

鍾情局

** 博客文章文責自負,不代表本公司立場 **