早前講過應該給孩子一點挫折。今次講一個真實個案。
我有一位朋友,他係超級地產經紀王,如果了解過他坎坷的童年,自然明白他何以擁有這種打不死的超級性格。
這位經紀王朋友,他由地產經紀老散,做到營業董事,最近一年生意比較差,但過去幾年,極其風光,我估佢高峰期計埋佣金,年薪過千萬。
他做生意,真係好得,推銷豪宅予內地客,雖然有好多伙記,但仍然事事親力親為,經常自己飛上北京上海簽約,真係馬不停蹄。也不知道是什麼緣故,他有許多內地客人。
我問他點解做得咁掂?有這麼多內地客戶?他說內地豪客來香港買樓,人生路不熟,最怕給經紀呃,通常都會貨比三家,有時就算看了好多間樓,亦未必落到決定。他說要做得成生意,除了服務周到之外,關鍵還是死繞爛打,夠chur,夠勤力。他會搵好多盤給客人揀,不斷嘗試。客人要低價的,就搵平的;要靚裝的,就搵豪一些的;嫌舊嗎?就搵新的,要超值嗎?就搵銀主盤。客人要求的,他都盡力做到。總之,認錢唔認人,香港人也好. 大陸客也罷,都係米飯班主。
我又問他,點樣可以煉就出這樣的性格,他笑住回答,道理其實好簡單,這是環境使然,如果你有我這樣「饑渴」,你都會係咁!
聽完他的童年故事,真係好有粵語殘片feel,賺人熱淚。他三歲死阿爸,八歲死阿媽。在姨媽家裡長大。姨媽有六個仔女,佢等如係第七個,排在中間。一家九口,住在黃大仙公共屋邨。姨媽人倒不錯,但寄人籬下的感覺,非常難受。姨丈做三行,為人粗暴。食煙飲酒,稍有不如意者,小朋友也照樣「兜巴星」,他覺得自己不是姨丈親生仔,打起來特別大力。所以他自細許下宏願,一有機會就要離關這個「家」。可惜讀書成績麻麻,讀不成大學,只好出來打工。第一份工便是地產經紀,一做就是三十年。他說,如果不是父母早死,要寄人籬下,肯定不會有這種性格。
不要看經紀王朋友貴為營業董事這樣高級,他可以在太古廣場等客人買完名牌,先至去睇樓,一站就是兩三個小時,而且面不改容。點解要咁辛苦親自去?原因係他知道客人如果滿意他的服務,會帶來更多客人。雖然大陸人唔易湊,但勝在有錢,舊客帶來新客。錢就會繼續來。所以他絕不放過任何可以做得成生意的機會,而且唔想俾晒夥記做,怕做做吓個客跟埋夥記走。
聽完他的經歷,讓我覺得,我細個時都唔夠慘,如果小時候可以面對多些挫折,現在肯定會更加堅強啦。
黃毅力
** 博客文章文責自負,不代表本公司立場 **