呢單嘢實在Old News到不行,話即用即棄竹筷子頂部圈圈愈多,回收次數愈多。呢類有話題無事實嘅偽新聞,總係久不久就會喺網上翻炒。為免再有人「中伏」,膠仔決定寫返篇文。
台灣《三立新聞》2013年報道,有醫生向記者轉述一個喺回收工廠嘅病人表示,竹筷子頂部圈數代表咗回收次數,圈數愈多,表示愈多人用過,所含漂白劑亦都愈多。記者仲煞有介事咁做咗個實驗,將蝦仔同有三個圈嘅竹筷子放入同一杯水中,一晚後啲蝦有過半數瓜咗。
其後《東森新聞》引述業界人士否認指控,強調圈圈刻痕純粹係裝飾。首先回收筷子清新再漂白,整個過程涉及太多人力物力,價格比製造新筷子仲要貴,無人咁戇居嘥錢做呢啲嘢。當年有網民提出最環保同埋安心嘅方式其實係自備筷子;如果萬不得已要用即棄筷子為求安心,用完拗斷佢囉。
我同樣覺得,食客用完即棄筷子之後都會掉入垃圾筒,照常理筷子下個目的地就係堆填區,邊可能有人咁神心逐袋垃圾搵返筷子出嚟?另外要注意嘅係,《三立新聞》用嚟做嘅實驗係一杯「死水」,一堆蝦仔整晚只能依靠杯中氧氣為生。一晚過後氧氣用得七七八八,有無放筷子都好,啲蝦都會死傷大半。
其實同樣流到爆嘅網上傳言仲有好多好多,膠仔覺得我哋無可能阻止其他人轉發,畢竟呢種都係言論自由。重點在於我哋收到呢類消息之後,一定一定要核證,用用腦袋諗吓真定假,唔好人講乜你信乜先得。
神州快訊
** 博客文章文責自負,不代表本公司立場 **