安全至上。
本月18日是麥秋成的43歲生日,9月12日下午湯怡同老公撇下女兒麥QQ(麥紫喬),到去年中開張、位於西貢的臨海酒店Staycation,一場去到西貢,當然要去Join玩獨木舟享受吓陽光,出一身汗再沖個靚涼,食完個浪漫Dinner,完全係造人好時機,可能下年麥QQ會多一個細佬或細妹喎。
9月12日下午二時許,麥秋成駕車與老婆湯怡齊抵達西貢WM酒店,但未見愛女麥QQ同行。身穿黑色貼身背心裙及腳踏拖鞋的麥太,與穿上黑色背心及短褲的麥秋成一到酒店即搵餐廳醫肚,兩人在一家泰國餐廳門外研究餐牌,覺得啱心水就由侍應帶入座,湯怡拍過唔少戲,侍應可能認得眼前是知名藝人,故醒目地安排了較隱蔽的位置給他們。
麥氏夫婦撐枱腳撐足45分鐘,之後往泊在停車場的座駕取回物品,接著再上房休息,在房間逗留大約15分鐘後,見湯怡換上長袖防曬衣及黑色短褲與老公往附近租獨木舟玩,最終兩人租了一艘雙人獨木舟,完成手續後,湯怡率先上獨木舟的前座位置,麥秋成緊隨並將防水袋放好,然後開心出海享受二人世界。
划了不久麥秋成脫去上衣並戴上白帽享受陽光浴,可能湯怡怕雙腿曬至兩截色,索性除去黑色短褲,並將短褲交給老公收好,之後便划向大海。見湯怡好興奮手指指示意老公望呢度望嗰度,直至離岸較遠位置,兩人才將口罩除下,睇得出身為父母的兩人好注重防疫意識。