李家傑有意辦報?

恒基公子李家傑在政協會議上批鍾庭耀出咗位，外界唔係咁關注佢發炮的理據，反而更關心他的動作，這位貴公子會否慢慢提高調子，開始在政壇上出出位呢?

李公子當日發言時照稿讀，但其普通話字正腔圓，似乎都下工夫練過，唔係求求其其，既下苦功，必有所圖，唔似只係做咗政協常委交交功課咁簡單。或者咁講，成件事都有啲交功課俾阿爺的味道，但呢個學生咁勤力交功課，又係唔係都想考好啲成績呢?

咁Ariel就四圍八吓李公子的動向，又俾我八到有人話李公子原來想搞報紙，而可能對象是而家籌緊旗的《都市日報》。

線人話自從黃浩入主《都市日報》後，動作多多，其中一個舉措係四圍拉人入股，壯大《都市日報》資金，最矚目係搵咗郭炳湘阿水哥落叠，早前《巴士的報》寫過呢件事，阿水哥透過發言人都唔否認同黃浩有偈傾。線人話《都市》傾緊水哥入股，可能都係10幾、20%那一種，對水哥來講根本唔係乜嘢錢，最後成事可能佢都俾個仔去理，唔係水哥自己理。

線人話李家傑都係《都市日報》拉攏入股的對象，因為李公子想搞傳媒都唔係今日的事，但市面上好的投資對象不多，除了三線報紙之外，《都市日報》都係其中一張有機會參與又「企理」少少的報紙。不過件事可能只係在好初步階段。

最近《都市日報》新請一個高層Miranda Chan，入去做COO，大家注意到佢做過壹傳媒和《星島》的背景，無留意佢在百仁基金做過，李家傑係百仁基金的創會主席，同Miranda Chan自然熟，《都市》中人就好多猜測，Miranda會唔會係先頭部隊，入去睇清楚盤數，估清楚有無得做，得就引入李公子去入股投資呢?

不過有李公子伙記話，大家估多咗啦，李公子唔係有意辦報。

呢啲澄清我聽到都照寫，但係問心只係信一半啦。雖然人人都話報紙係夕陽工業，但論影響力報紙又真係好大，所以好多富家公子都好似好有興趣搞傳媒，睇嚟還有連場好戲等緊上演呀。

Ariel

** 博客文章文責自負,不代表本公司立場 **

匯賢智庫理事會主席葉劉淑儀又有新搞作，計劃在下月中港搞「2024全球繁榮峰會」，邀請全球近300個嘉賓來港，討論影響全球繁榮的議題。

葉劉淑儀計劃在下月中港搞「2024全球繁榮峰會」。

峰會邀請了諾貝爾化學獎得主、國際結構生物學權威羅傑．大衛．科恩伯格教授（Professor Roger D. Kornberg）擔任主題演講嘉賓，主講者甚有份量。

諾貝爾化學獎得主科恩伯格教授將擔任主題演講嘉賓。

葉太話希望外國朋友嚟香港睇睇，香港一切冇變，生活如常。佢話香港應有角色，應該是缓沖區而不是戰場，要推動民間交流。

峰會的演講嘉賓，還包括知名經濟學家、霍普金斯應用經濟學教授漢克（Steve Hanke）。

葉太又評估政治形勢，話23條立法已經軟著陸，美國暫時不會太強硬針對香港。她每日收到有關外國對香港的新聞簡報，發覺近日外國已不太關心香港政治，主要關心經濟問題，例如某些外資銀行裁員等等。

她認為，美國宣佈針對香港23條立法的行動，主要是國務卿布林肯話，要限制香港相關官員入境美國。但布林肯的限制名單不會公開，正如香港拒絕外國人入境也不會公開名單一樣。

她判斷美國今次對香港23條立法的回應，比上次2020年針對香港國安法的回應克制。當然仍然要鬧美國干預香港事務。