最後入股「協議」為何救不了亞視

行政會議終於決定了走過半世紀的亞視命運，由昨晚亞視突然單方面宣布主要股東王征會將亞視股份賣俾王維基，到今日王維基的港視澄清同亞視無達成協議，再到下午亞視經理人德勤開記者會，宣布王征及黃炳均今早約11時已經與一投資者簽署條款協議書，出售亞視52%股份，一個月後將正式簽署買賣合約。事件千變萬化。

就在德勤2點召開記者的同時，原來行會已就亞視的前途開緊會，今次決定其中一個關注點係德勤最後宣布的這份條款協議書，能否成為救亞視的最後一續命燈。

據了解，同亞視簽條款書的係曾入標洽購亞視的買家之一胡景邵，協議作價5.5億，分期支付。首期5千萬，買家可以隨時取回；第二期一個月後等亞視獲政府續牌後，才支付3.5億；第三期一年若無其他問題再俾1.5億。最後如果3年亞視達50億市值，再多俾1.5億。

政壇高人認為，成個條款書，並不實質，例如第一期5千萬俾咗未，或者幾時俾呢？呢啲基本資料都無，而且首期都寫明隨時可以退回。從政府的角度，就算係昨日收到呢份條款書，頂多是一份意向書，好難接受。

仲有「特別」之處是那份條款書上的日子是3月31日，但德勤話是今天（4月1日）早上才簽。

依家睇嚟，由昨晚亞視單方面宣布賣俾王維基開始，亞視大股東似乎想力挽狂瀾，真係睇到外界眼都突埋，到今早同匯友簽下呢份條款協議書，亦都救唔到啦。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。