《我家》首度與鮑起靜合作 車婉婉坦承是難得的學習機會

婉婉跟鮑姐的戲份，大部份都是嗌交和喊戲。 

謙稱自己是拍劇新丁的車婉婉，最近在TVB劇集《我家無難事》首度跟影后鮑起靜合作，飾演母女，婉婉坦言睇完劇本加上有機會跟鮑姐合作已勁開心，真正合作時亦感受到影后的「威力」。劇中婉婉兒子是高頭大馬的胡㻗，雖然現實中囝囝Justus（暱稱BBQ）只得4歲，但勇氣可嘉，令她相當欣賞。

46歲的婉婉坦言無諗追下一胎，除非一定生女。 

婉婉難得跟鮑姐合作，她坦承是好好的學習機會。

婉婉在《我家》的拍檔大部份都未合作過，她笑言：「我根本係個新人嚟，拍電視劇其實好少，只係因為《皆大歡喜》覆蓋太過強勁。」所以對於今次角色戲份和挑戰性都大感興奮，「監製（王心慰）搵我傾『Double』角色時，我已經流晒眼淚，好鍾意呢個角色，當吓除咗鮑姐外其他角色都未定案，我一聽到鮑姐做我阿媽，又聽晒個故仔，已經好恨拍。」

婉婉跟鮑姐的戲份，大部份都是嗌交和喊戲。 

劇中婉婉初次跟飾演哥哥和兒子的馬德鐘和胡㻗合作。

讚BBQ勇氣可嘉

婉婉跟游泳教練丈夫Jonathon，經常帶BBQ去戶外活動。

首次跟鮑姐合作，婉婉未開工已想好向對方請教，埋到位更加令她難忘，「我同鮑姐嘅場口唔算好多，但啲場口好激烈，好多嗌交戲，頂撞佢，啲女都係頂心杉，但係鮑姐一嚟好有媽媽感覺，我哋好易入到位，件事好容易就OK啦！我唔識點樣講，就好似啲積木跌晒落啱嘅位咁樣，化學作用係點，留待觀眾睇完之後話番畀我聽，但拍嘅時候，我同鮑姐都覺得件事係對勁，佢個火有幾大我個火就有幾大。」

婉婉讚賞BBQ學滑板屢敗屢戰，跌到痛都肯再試。 

17年婉婉為丈夫Jonathon誕下囝囝BBQ後已開始做人母角色，但想不到這劇會有胡㻗這樣神高神大兒子。不過真實中的囝囝仲好細粒，但BBQ的勇氣卻令身為媽咪的婉婉相當感動，「最近帶佢去學滑板，佢係唔炒埋牆都唔停，勇氣幾可嘉，唔係個個細路仔炒埋去10次都仲去玩，跟住佢有一次跌到個pat pat好痛，佢喊到不得了，但佢喊完自己同個教練講，我想再試吓喎，好Man，好型仔，好勇呀！男仔能夠有呢種勇氣，跌低再試，我係好欣賞佢，再試佢就成功佢好開心，我有解釋番畀佢聽，唔放棄再練就會成功。」

車婉婉在劇集《我家無難事》首度跟鮑起靜合演母女。

相隔23年再度「同車」，車婉婉難忘與馬明首度合作趣事：真係全日粒聲唔出

由徐正康夥拍新鮮人陳萍April擔任監製、麥世龍擔任編審的《妳不是她》，1月12日八點半翡翠台播映大結局，雖然全劇最大懸念「平行時空」經已揭盅，但據知結局依然有反轉位。11日林信（丁子朗飾）驚揭身邊的夏莉（馮盈盈飾）並非原本認識的夏莉，二人為此發生激烈爭執。12日晚二人經歷連串拉鋸及爭吵後，將作出一個令人意外的決定，密切留意！

幾經波折嘅夏莉同林信，原本已經和好如初咗。

不過因為林信意外發現咗夏莉部7G電話，令二人再度情海翻波，到底林信最後會點揀？原夏莉嘅故事又會點發展落去？密切留意大結局。

11日晚，全劇最大彩蛋馬國明亦終於登場，飾演的士司機馬明的他，劇中主要任務是與飾演林善的車婉婉發展姊弟戀。搞笑的是，現實中升呢人夫不久的馬國明，在劇中自稱單身兼性格「好鬼悶」之餘，又大談擇偶條件及兩性相處之道：「做女人唔使成日都咁Tough，唔使吓吓都死頂，間唔中流露番少少女性溫柔，需要膊頭咪開聲咯。好多男人見到太強嘅女人，佢哋就縮唔敢追架喇」、「唔係每個男人都鍾意小鳥依人嘅，我就唔鍾意湊女喇，我鍾意啲女人係成熟啲，有自信啲，兩個人相處最緊要夾唔夾。」

馬國明以「真名」上陣演的士司機，勁有代表性。

車婉婉形容呢一段關係係「倒後鏡之戀」。

馬明演暖男真係啱晒數。

車婉婉見到以前可以一日唔講嘢嘅馬明，突然變得今時今日咁talk得，相信一定覺得好Funny。

馬明喺劇中大談兩性相處之道。

齋睇表面證供，馬國明繼《新聞女王》再於《妳不是她》中與婉婉正面交鋒看似甚有淵緣，原來二人緣份早於23年前經已啟動！現正忙於演唱會綵排的婉婉，百忙中抽空受訪時透露原來與馬國明於2001年拍攝《不必剎掣》MV時已首度合作，當年二人除了同樣飾演情侶，馬明亦巧合地在MV中飾演司機，二人相隔23年再度「同車」，可謂別具意義；婉婉更對昔日的馬明近乎有讚冇彈，並笑指當年的馬明可以「全日唔講嘢」：「我同馬明都真係有特別緣份，當時拍嗰隻MV時，我覺得呢個男演員好斯文，全日冇講過嘢，全日呀吓，拍咗一日架！同埋佢又高啦，樣又靚仔，身形又好，所以我對佢有好深刻印象。後尾佢愈嚟愈紅，我就發現佢原來都幾活潑同幾好笑，但已經冇機會再合作。估唔到一直去到最近，又突然連續同佢有番合作，仲有對手戲添，所以好開心，好有親切感。」

馬明今次為咗力撐新進監製，幾忙都勁爽快地一口答應客串演出，圈中出名嘅好好先生，果然名不虛傳。

據知馬國明是次答應客串馬明一角，全因為了支持新進監製April，更是百忙中抽出空檔拍攝，絕對是有情有義代表。其實April與馬明亦相當有緣，二人先後於《白色強人》系列及《降魔的2.0》中合作過。