「軒公」係得嘅！

2026年04月24日

最近有位歌手自薦做保安局「正向引導」項目導師，呢個「正向引導」項目，係喺法例框架下，俾一啲喺黑暴時候拉咗，但未被檢控嘅年輕人，透過分享、到內地交流訪問等不同項目，幫佢哋認識國家，建立正確價值觀，重新規劃人生，融入社會再出發。

零零發講嗰個，就係實力派歌手「軒公」。佢1981年喺廣州出世，從小喺內地接受教育，到差唔多廿歲時，就喺廣州展開歌唱事業，憑藉自己嘅實力，好快就得到香港一間唱片公司嘅賞識，喺2002年簽約來港發展同定居。雖然「軒公」嚟咗香港發展，但係佢對廣州一直都保持住一份深厚嘅感情，所以平均每年都會返廣州兩三次，除咗探望父母、朋友之外，亦都會出席一啲慈善活動，例如環保、賑災活動，又會去中小學探訪，勉勵年輕新一代。

「軒公」作為一名唱作歌手，憑自己嘅努力喺樂壇發展，成為人氣偶像，獲獎無數，演唱會坐無虛席。不過「軒公」即使幾紅幾受歡迎，都永不忘本，咁多年嚟都對自己廣州人嘅身份非常自豪，對國家同民族亦好有認同感，即使去到世界各地不同地方開演唱會，都好自豪咁話比大家知「我係廣州人」。

雖然「軒公」咁心繫家國，但之前都曾經用咗一啲錯誤嘅方式，去演繹對社會發展嘅意見，例如喺2012年，反對派喺香港大肆抹黑政府想推行嘅國民教育，「軒公」就曾經係喺社交媒體聲援反對派，仲話想去政總同所謂召集人「黃痴瘋」握手。2014年「非法佔中」嘅時候，佢更同一班「黃偽人」領唱一首「鼓勵」民眾參與「非法佔中」嘅歌曲。喺2019年黑暴嗰陣，佢又再用擦邊球嘅方式，發帖文支持示威者，令一眾黃人甚至係暴徒都好high，認定「軒公」係「手足」，所以佢嘅行為，可以話係變相鼓勵咗一啲人繼續參與所謂「抗爭」。

過去咁多年，「軒公」一直都冇就呢啲偏頗嘅行為作過任何解說，直至最近佢自薦做保安局「正向引導」項目導師，並且喺接受專訪嘅時候，公開承認錯誤，為自己當年無知嘅言行道歉。「軒公」好坦白咁話，之前做出種種不當嘅行為，係因為當時自己對社會大局認識唔深，俾社會氣氛衝昏頭腦，但經過呢幾年結合咗自己嘅社會經驗同大局觀，加上深刻反省之後好後悔，所以希望以自身經歷，引導年輕人認清錯誤、重新出發。

一啲因參與2019年暴動而罪成入獄嘅年輕人，接受媒體訪問時都講過，佢哋當時係受到「假新聞、假消息」誤導及煽動下參與暴動，更有年輕人指當時係受到偏激同錯誤資訊荼毒，係「被利用」、「人哋叫做乜就做」，感到非常後悔。事實上，過去嗰十幾年，外部勢力聯同「生果報」、「臘腸新聞」呢啲黃傳媒，不停散佈假新聞同假消息，「軒公」可能同好多年輕人一樣，因為當時社會氣氛，加上睇睇埋埋一啲失實同煽動性嘅資訊，因而被牽動情感、影響判斷力，作出種種反政府，甚至係違法嘅事。

雖然「軒公」而家踏出正確一步，但有啲黃人就酸溜溜話，「軒公」咁做，係為佢所屬嘅唱片公司，親近政府向內地示好，借機幫公司喎！講真，唱片公司嘅母公司「XX集團」進軍內地市場多年，足跡遍佈北京、上海、深圳、廣州等多個大城市，業務涵蓋鐘錶珠寶、房地產、金融、影視文化等多個領域；而間唱片公司旗下亦擁有多位樂壇及影壇重量級人馬，好似Joey、鋒鋒同埋基仔……位位都進軍內地多年，撈得有聲有色，幫公司搵到盆滿缽滿，佢哋使唔使大費周章搵「軒公」出嚟做場戲，向內地示好搲生意呢？
坦白講，當年唔單止「軒公」，有唔少artist都有可能被假新聞誤導，咗做咗好多唔恰當嘅嘢；而好多年輕人都一樣，曾經被一啲失實同煽動性嘅資訊矇蔽而被人利用，走上暴力、違法嘅不歸路。2019年嗰班年輕人被假新聞衝昏頭腦，唔係佢哋蠢，而係外媒奸。而呢個「正向引導」項目，正好俾年輕人一個反思過去，reset人生嘅機會，等佢哋去做好生涯規劃、捉緊青春去積極發展未來。

「軒公」作為一名公眾人物，不但公開承認自己曾經犯錯，更希望透過分享自己嘅心路歷程，引導年輕人認清錯誤、重新出發，實在係既勇敢又負責任嘅行為。其他曾經被假新聞誤導嘅藝人，如果真誠知錯能改，都應該大力支持「正向引導」呢類工作，用自己嘅影響力去幫助年輕人走回正路，咁樣唔單止係對自己負責任，更加可以對年青一代發出「正能量」。大家只要肯鼓起勇氣，踏出第一步，咁未來嘅人生，係絕對可以重新設定！

鍾情局●零零發

鍾情局

** 博客文章文責自負,不代表本公司立場 **