地主報疑雲

本網昨日報道一份綜合性收費報紙正在醞釀開辦，出面的搞手是資深報人郭慶榕，而幕後話事人是左派人士蒯(音：拐)轍元。  

行家當然關心係咪會多個就業機會啦，政商界都竊竊私語，當然係想八吓幕後的水喉。  

部份人士就仍然相信是本地財團，仲形容呢份新收費報紙為「地主報」，不過，聽聞唔少大財團的身邊人都否認自己有份。查實本地財團想搞報紙、電視的傳聞揮之不去，事出有因。    

話說97年回歸前後，亞洲電視易手，蝕到入肉的林百欣淡出，內地商家封小平、劉長樂，以及政協常委棋哥(陳永棋)逐步取而代之。期間有本地中間人曾經試圖將一些大財團拉埋一齊，諗過出資玩吓電視架，而且唔係齋吹的階段，都已經去到傾出資幾多的問題，之但係，中間人與當時亞記的牌面話事人封小平接觸過後，對方的訊息相當明確，話唔會賣，所以先變成無米粥。    

去到2010年，再有傳聞本地富豪第二代，有意與多個大地產聯手買一份本地報紙嚟做，當時傳媒報道講到似層層咁，去到研究點樣發大嚟搞，但後來消息曝光後，買報之事又係不了了之。    

今次吹出再有收費報紙可能出爐，搞親報紙都要講緊每年出幾多億，水喉到唔到位係關鍵，開始大家唔信，但晨報開始大力挖角請人，已到了唔到你唔信的階段。

雖然有傳聞指係北方水，但係主事人出聲明否認，話資金來自本地基金，行內人即刻聯想到同有實力的本地地產財團有關。

我哋就覺得搞傳媒增大自己的話語權，講嘢唔使靠人，又有枝重炮防身，無論係北方富豪，定係本地財主，都有好多人想玩啦。

Ariel

** 博客文章文責自負,不代表本公司立場 **

Ariel上周六講到《香港晨報》凍結請咗但未返工的人手，叫已簽約但未上班的新員工不要上班，消息逐漸通天。辭咗舊職但未返《晨報》的採主、記者源自不同報館，他們重回已遞信的報館查詢，由於多數已在成個月前辭職，職位多已被填補，所以未聽到有人返到舊公司，搞到這些已離職人士有少少怨言。

《晨報》向這些未返工的員工話佢地有股東變動，所以叫人暫時不用返工，《蘋果日報》指據了解，有《晨報》股東決定退股，公司《晨報》正與超過一名潛在股東洽商，惟轉變股權需要審核賬目資料，故暫時凍結人手，難以估算延遲多久，遂通知受影響的未上班同事。晨報已聘請了逾200人，當中約120人已上班，另有約10多個多屬主任級人員原擬於5、6月上班，他們最受影響。

就Ariel所知，《晨報》幕後搞手蒯轍元去年找到一個內地商人出第一筆錢，約六千萬元，作為辦報的開拔資金，但這筆錢至今已用得七七八八。而蒯轍元近日被捕後，恐怕亦難再找那個初始投資的內地商人再出錢支持，所以要另找投資者。不過報紙尚未創刊，成績未知，要另找新投資者並非易事。

故此《晨報》叫停未上班的新人不用返工，係一個止血行為，始終用現有資源去支持120人，比支持200人容易，辦新報紙的確不易為。