今屆文憑試放榜，有12個考獲7科5**級的狀元出爐。雖然家長望子成龍深切，好想子女成為狀元。我從來覺得這些狀元資訊，對家長的參考意義不太，因為考生有7.8萬，只有12個狀元，人數太少，可供參考的意義不高，反而係哪科試卷最「攞命」，意義更重大。
自從推出文憑試以後，要求學生3、3、2、2、2，意思係學生中、英文要達到3級，數學、通識及其他一科要2級，才符合入讀大學最低要求。好多家長初時以為通識最考起人，漸漸才發現中文至係殺人之卷。
今屆中文合格率51.5%，比英文的 52.8%還要低。成績唔好的學生，科科都唔得，只能怪自己唔夠努力，但成績科科都好，惟獨中文唔得的學生，令人特別惋惜。據悉今年有240名學生，英文考到5級或以上，但中文達不到3級的水平，因此無緣進入大學。大家不要忘記，英文考到5級的學生，其他科目的成績應該都不會差，如果中文科合格的話，這些學生好大機會入到大學，他們純粹給中文科殺死。
事實上，我有不少朋友的子女的遭遇差不多，讀名校，成績唔錯，就係因為中文科成績唔得，入唔到本地大學，惟有到海外留學，費用也相常高昂，一年差不多要50萬元，四年就要200萬元，市儈一點講，其係學科成績唔錯的學生，就係因為中文科考不到3級或以上，成本係200萬元！
亦不要以為人數只有240人，比例唔算好高，中招的機會唔大。在7.8萬個應屆文憑試考生中，估計成績比較優秀的百分之五學生約3900人，即係話，每17個原本可以入大學的優秀學生中，就有一個係因為中文科成績唔達標，入唔到大學，比例其實相當高。
至於殺人之卷中文科，綜合多位老師的意見，失分最多、最致命的部份是文言文閱讀理解，由於好多學生以為文言文所佔部份不多，操練不足，解題出問題，結果整個部份拿不到分數。所以，要惡補中文的話，先惡補文言文。
不過，我覺得最大問題還是學生家長過份輕視中文，他們機關算盡，想子女贏在起跑線，自小催谷子女講、寫、讀英文，對中文不屑一顧。結果考試制度一改變，子女便成為制度改變的犧牲品。
過去，中文科考獲E級，較現時考獲3級容易。至少，對文言文的要求，沒有現在那麼高。換句話說，入大學的中文要求比以前高了。至於理科生，以前對於中文科成績的要求就更低，他們只需在中五考獲E級，過到關，中六中七可以不考中文。現在要讀中六程度的中文，就比以前更難了。
在這個中文科要求高了，但家長卻不予以重視的情況下，好學生亦好易中招。每一個遊戲，都有其規則。新文憑試的遊戲規則係科科都要一定的水平，中英文同樣重要，即使好優秀的學生，如果因為某科不達標，入唔到本地大學，實是非常可惜。中文科就係這種殺人科目。
我奉勸家長訓練子女自小開始要多看中文書、多讀中文報紙，如果唔能夠自小養成讀寫中文的習慣，到臨考試前才「臨急抱佛腳」，就已經太遲，補救唔到。
盧永雄
