鬍鬚有啲慶 林鄭較熟書

由7間電子媒體搞的特首選舉論壇結束，總體來說得個悶字，無乜勁嘢爆，亦無上屆辯論唐唐話CY「你呃人!」的猛料金句。若唔係政治發燒友，要捱兩個鐘都唔易。

睇完總體感覺是胡官和鬍鬚圍攻林鄭。而林鄭就相對克制，雖有攻擊鬍鬚，但無鬍鬚隊佢咁出力。

整個辯論鬍鬚講得比較好的是兩句金句，話林鄭「唔係CY2.0， 係撕裂2.0」，這顯然係一句由競選團隊事先設計好的金句， 鬍鬚按劇本出擊。

不過去「兩分鐘主場」互相質詢講政治時，鬍鬚就有少少失態，呢個環節係做主場的候選人有優先發言權，鬍鬚做主場時話「我主場唔該熄佢咪」，唔俾林鄭插咀(按規距可以如此)。 到林鄭做主場時，他回答時林鄭再問，鬍鬚就好慶咁話「你講哂得啦，唔使俾我講」，其實是人家主場， 的確可以插口問問題俾意見。

在互問和辯論的環節，各自就對方的弱點攻擊。林鄭問鬍鬚商會過去 9年都提出兩級利得稅制，但他9年都不接受，但在參選時突然提出 ? 鬍鬚承認確實提了好多年，但近年外國有變化，如英國脫歐後首相文翠姍減稅…說到這裏林鄭已插口，叫他回到主題，話中小企已在水深火熱中等減稅。

林鄭又問政府有大筆盈餘，政府部門為何要實施011策略，即部門開支第一年持平，第二年減1%，第三年再減1%。鬍鬚唔係幾答到，只係話好多部門的預算開支都使唔晒。林鄭就列出唔夠使的部門，話圖書館差不多要因此提早關門。

鬍鬚反隊林鄭比較入肉之處，係話林鄭講過民意與她政見相違時會辭職，而家民望比他低會否棄選。 林鄭避重就輕話同團隊研究過不同調查問法不同，又話亦有調查她的支持高3個百分點，被鬍鬚贈了一句「你信嗎？」 鬍鬚繼續攻依家網上報道辯論，林鄭在facebook上有好多嬲 豬。林鄭自認自己在facebook上是弱者，反攻鬍鬚搞facebook起步早，在政府內一早做嘢攞like like，而她自己就連上網時間都無。林鄭又話鬍鬚的政治助理阿聰搞facebook好叻， 若她當選要挖角咁話。

整場辯論林鄭表現淡定，只是答到民調時略急，但基本上予人熟書之感，講政策好實在。而鬍鬚和胡官則有點虛，但鬍鬚狙擊林鄭絕對不hea，甚至有少少太慶過火的感覺。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。