一場罵戰 無人關心樓價問題

今晚舉行選委會特首候選論壇，三個候選人曾俊華、林鄭月娥、胡國興接受選委及公眾提問，本來以為會比電視辯論更高水平，多點政策問題辨論，例如講講好多人關心的樓價問題，怎料比電視辯論更似嗌交，火藥味夠濃，高水平欠奉。

抽到出來親身提問的選委，有八、九成是泛民選委，好多問題本身已相當政治化及針對林鄭，加上胡官和鬍鬚曾一樣主力砌林鄭，變成一個圍毆林鄭之局。不明白為何泛民選委只有325個，竟然有這麼多可以抽中，其中一個可能是泛民選委大多數有入紙提問。

辯論近乎罵戰，飲食界選委黃傑龍看不過眼，提問時話「辯論互相攻訐，不堪入目。林鄭月娥和曾俊華兩個候選人可否用舊同事身，欣賞及感激對方?」

林鄭話本是同根生，本想這次選是君子之爭，想自己做自己的事，不會做好多謠言，怎知仍然有針對她的很多料爆。她提到做發展局局長時做過阿John(曾俊華)的下屬(曾時任財政司司長)，去他的房間開會，發覺他枱頭沒有什麼東西。她好羨慕，因為她做嘢要做好準備，要睇好多文件。

鬍鬚曾就回應話，佢同Carrie(林鄭)做了好多年同事，他了解林鄭的工作方式，林鄭不了解他，他要work hard 同work smart(努力工作，做得聰明)。鬍鬚愈講愈入肉，話林鄭辭職當日提到，若同事覺得她做事令他們不開心，她會致歉，「我好明白佢為乜應該道歉，其實好多人對佢有意見，我有十幾個同事幫我助選，我唔覺得Carrie有。做人要吸引到人幫你做嘢才成，唔可以自己做晒，這不是領袖。」

林鄭其後再回應，話曾俊華成日話無政府同事幫她助選，對她的助選團不公平。她接著數了好幾個前高官幫她助選。又話有一個AO飯局，她和曾俊華都是核心，她不想這批人分裂，所以特意無拉這些前AO助選。

曾俊華又再回應，話林鄭講幫她的是退休高級官員，他講的是落手落腳落區的人咁話。

Ariel聽完一輪，真係唔係好關心邊個幫他們助選，其實唔使咁執著。即使大部份選委提問都係咁政治性，候選人係唔係可以主動講講普羅市民較關心的問題，例如樓價呢？

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。