毓民宣布告別政壇 又隊自己友連佢出相都封殺

自從青年新政梁頌恆、游蕙禎被DQ後，熱血主席鄭松泰又被拉，好多「熱普城」黨友都希望教主黃毓民出嚟主持大局，不過教主突然喺facebook出長文，宣佈不再從政，全面退出政壇，亦唔會再參選。

毓民篇文叫「為人辯冤白謗 第一天理──致為公義而受逼迫的香港青年公開信」，除咗坦承去年選舉失敗之外，循例大鬧泛民、大中華膠以及特首梁振英等。

但佢亦鬧「嶄然見頭角」嘅年輕人，更唔開名鬧埋自己友，指有人玩清黨「愈玩愈興奮，矛頭甚至指向MyRadio及我身邊的人」，令佢非常遺憾。教主又話有人連佢秘書喺facebook上載同某些人吃喝玩樂相，「竟然也不容於某位『敵我分明』的『面書』朋友」而被封。佢話有人搞清算要寧枉毋縱，因為私怨、朋黨冇晒理性，「這樣的人還可以相信嗎？」

由於教主無開名，究竟是指陳雲還是黃洋達呢？

另外毓民又話要向政治講再見，聲言唔應該阻擋年輕人前路，所以決定退出政壇，唔參加或組織政治團體、唔參加選舉，回歸返去文化傳訊同教學崗位。但佢又留條尾巴，話唔等同佢唔再過問政治。

政壇八卦友話，而家政治橫風橫雨，法庭嚴判激進示威者。有人話毓民出長文係想重出江湖啊，亦有人話佢講明會退出政壇，佢啲靚都要好自為之啦。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。