政事
學聯三子上京要見總理李克強，內地已註銷其回鄉證，在香港機場都已經不能成行，如Ariel事前聽到的消息一樣，阿爺連入境也不想讓他們入境，免得在內地阻止他們示威時推推撞撞更麻煩。
Ariel參加同學飯局，變成吵鬧現場，有支持佔中一派，話學聯此個行為係義舉，為港人爭取真普選。話中國一個泱泱大國，連俾學生入境以及和他們對話都怕，真係難以想像。
此語一出，反佔中一派馬上力反擊，話如果美國人爭取善待關塔那摩灣監獄的犯人，要和美國總統奧巴馬對話，你話奧巴馬見唔見？他們認為佔中運動日趨低落，學聯話要上京見領導，一開始連泛民都知道不可行，但學聯仍堅持要做，只是一場騷，咁就玩足三個星期，日日有新聞，一時話APEC時候上，一時又話會議之後才上，今天說要找董伯伯幫手， 明天又話叫范太傳消息，總之新聞多多，無樣實際，只為製造新聞維持佔中的熱度，大家點解要陪佢顛呢？
兩派人吵過不停，飯局也面左左收場。不過話說回來，學聯北上的新聞點都要告一段落，咁學聯和學民思潮，下一步又有什麼嘢搞呢？
Ariel
** 博客文章文責自負,不代表本公司立場 **
內地大型地產發展商恒大集團睇中娛樂大亨楊受成旗下的新傳媒，提出以9.5億元，收購75%股權，楊受成將會購回新傳媒旗下媒體及出版業務10%股權及九龍灣鴻圖道一個物業，換言之，楊受成仍保持新傳媒出版業務小股東的地位，不會完全退出有關業務，或者做吓「教車師傅」，教吓恒大老闆許家印點樣做媒體。
新傳媒現時出版的雜誌，包括《東方新地》、《新假期》、《NM+新Monday》、《流行新姿》以及《經濟一周》，但《新報》則由楊受成私人持有，不包括在是次交易之內。
新傳媒做雜誌好成功，旗下最大的雜誌是娛樂《東方新地》，挑戰最大娛樂雜誌、壹傳媒的《忽然一週》的地位。呢個交易作價9.5億買新傳媒75%，即係100%股權作價12.7億，睇落價錢好好。新傳媒停牌前只有4.1億市值，恒大收購價比停牌前股價有208%溢價，若最後收購落實，小股東發咯。
如今雜誌整體難做，新傳媒亦受影響，至今年6月底的年度廣告收入跌咗2730萬，得番3.6億，集團年度純利跌咗一半至1106萬元。新傳媒停牌前市值4.1億，市盈率已高達36.5倍，若然以12.7億元收購價計，市盈率高達114.5倍，你話貴唔貴? 恒大許家印出到呢啲價錢去買，難怪楊老闆心動想沽。
不過財經界人士話，作價雖然貴，但買家唔出到呢啲價錢，傳媒老細又唔會沽，因為做傳媒大亨好過癮，有強勁的報紙甚至雜誌在手，行出來人人都要俾番兩分薄面，呢啲界外價值，好難用錢去計。加上而家想借殼上市，要買隻主板上市公司的殼，都要4.2至4.5億淨殼價，恒大收購價減咗殼價，等如用8.2億作價買新傳媒100%的雜誌業務，雖然都係好價，但睇落無咁離譜。
佢話許家印借咗個香港傳媒殼，有兩條路，一係在內地買媒體注入香港上市公司內，一係就全力在香港搞媒體，正路係前者機會大少少，因為內地市場大，許家印又到處搞新生意玩多元化，玩內地媒體容易開多一瓣大生意。當然，如果許老闆在香港買張報紙嚟玩吓，又係大件事囉。
