李波失蹤事件搞出大風波，睇今期《壹周刊》，係李波失蹤之前，同佢做咗個專訪，封面一個小分題：「出禁書發達」，吸引左我的眼球，買咗一本返去睇，結果真係有發現。
李波坦言，出版政治書並非為公義而是利潤豐厚，有關題材如「行刺習近平」，看似天方夜譚，吸引不少人購買，同領導人有關的政治書，好多自由行買。
李波講得好坦白，問佢出版書藉內容是否真實，佢直接答，「真假參半啦，好多官方嘅嘢你都唔可以信啦，真正好內幕嘅消息係好少，我冇乜connection（關係），多數係網站上面，其他出版物攞返黎嘅資料，當然啦，靠你自己分析，差唔多做情報工作咁，有好多唔同資料組合而成。」
李波直認作嘢，令人大開眼界。佢相關的巨流出版社，出版有啲書真係好出位，例如有本叫做《軟禁江澤民》，內容指江澤民因為同習近平矛盾激化，所以喺2015年5月被軟禁。真係作得就作，事實係去年9月江澤民生勾勾咁上天安門城樓睇閱兵，換言之成本書都係創作出嚟。
《壹周刊》幫李波呢啲出版社計計數，去翻查銅鑼灣書店嘅網站資料， 2015年出版嘅政治類書籍至少有50本，售價係120元一本，以每本印1500至2000本計，每本利潤四成，就可以賺取十萬元，換言之銅鑼灣書店去年出版政治禁書，至少賺500萬元。
小鯊覺得，好似李波呢啲出版人，擺明車馬炮，創作呢啲好無根據嘅所謂禁書，講領導人嘅衰嘢，自己賺錢發達。香港話出版自由，要保障呢種作野自由，諗落都相當諷刺。
小鯊
** 博客文章文責自負,不代表本公司立場 **
