古天后日誌｜現水平追貨值博率低風險高

1月10日，多雲，有幾陣雨，天氣潮濕，早晚沿岸有霧。隔晚美股早段表現唔錯，但至尾段又有聯儲局委員出嚟放鴿，三大指數除咗納指仲保持66點升幅，道指跟標指倒跌收市。標指雖然守咗3800，但都係收復唔到3900-4100之前嘅移動區間底部，美股暫時仲係反覆，日升日跌，未有明確方向。美股入場資金減少，市場等緊更多嘅消息作參考，本周四將迎來CPI，市場預估升幅會放緩至6.6%，隨住佔CPI高達34%的嘅房租升幅開始放緩，接下來幾個月CPI應該快速回落，但年底能否回落至4%以下，目前言之尚早。其中工資增長係左右CPI嘅另一個主要因素，雖然上週五即使非農的就業數據表現強勁，但薪酬升幅放緩，美股一樣受到刺激而上升。

市場暫時普遍估計聯儲局喺2月及3月各加息0.25%，5月再加息機會大減，息口或者喺5%徘徊一段時間。除咗CPI之外，聯儲局係以PCE個人消費支出物價指數作為通脹參考指標，兩者計算方法有差異，唔排除當中會有滯後，而一直以嚟CPI嘅降速係快過PCE嘅。除咗息口走勢之外，本周又到銀行股開始派成績表，美股再度踏入業績期。之前唔少大行對美股睇法相當悲觀，主要係預期企業盈利將倒退，而喺第三季唔少企業公布業績後，管理層亦對未來前景預測較為悲觀。今個業績期，若然盈利倒退唔係太嚴重，而公司管理層對前景睇返好啲，咁對美股應該有正面影響。

至於港股呢邊，暫時仍然喺高位徘徊，1月開局恒指用咗少於一星期時間，就由19300-400水平升足2000點上到21000水平，並已升抵21500呢個目標，加上唔少重磅股如美團(03690)跟京東(09618)等已升至阻力位並回落，呢一輪反彈已進入尾聲。至於今之回調要落幾多，純以技術走勢去睇，若然港股係要營造大型頭肩底，並入熊市開始步入牛市，假設21000水平係頭部，左肩為19200-19400點，即係大市要回調至19200-19400做埋個右肩。假如閣下手上無乜貨喺手，不妨等待回調營造右肩，即大市回落至20000水平樓先分段買貨，總比喺現水平，大市喺不足一星期升逾一成嚟追貨，畢竟港股目前喺牛熊嘅轉捩點，一個唔小心好易又被套窂，寧買貴，莫買錯，錯失機會，總好過痛失金錢。加上過多一個星期又到農曆新年假期，暫時都係忍手為妙。

6月21日，天氣炎熱，大致天晴，局部地區間中有幾陣驟雨。隔晚美股低開低走，不過龍頭股之一嘅Tesla股價因為再有車商加盟其充電站，帶動股價升5%，美股亦於低位反彈，道指收市跌245點；標指跌20點，納指跌22點，標指喺4300有不俗支持，暫時仍然算係高位整固。VIX唔算過，市場等待鮑爺今晚聽證會有乜講，睇睇會唔會從佢嘅口中，得知未來息口路徑方向。

美股方面無乜特別消息，但隔晚中概股跌到一仆一碌，反映中概股嘅金龍指數跌逾5%，主要係618購物銷售未如理想，大行出晒報告唱好電商股亦幫唔到手，拼多多插水7%，京東(09618)亦跌6%。雖然阿里(09988)指張勇辭去CEO一職，係為咗專注阿里雲發展，但市場又未必會好放心。事關有消息指，馬雲對於目前阿里狀況相當擔心，怕失去其龍頭地位，喺激烈競爭下，如不能走出困局，阿里會相當大鑊，呢個亦係點解阿里喺低估值下，股價遲遲未能重返紅底水平。

至於港股都無乜好講，國常會結束，但阿爺未有推出任何刺激經濟措施，繼續打嘴炮，雖然減咗息原意係想鬆一鬆銀根，卻搞到人民幣繼續走軟，A股跟港股噚日都腳軟。美國國務卿訪華，雖獲習大大會見，雙方見面後，未有發表任何聯合聲明，反映雙方未有共識，只係關係上打開僵局缺口，但始終你有你講，我有我做，唔見得美國會停止制裁中國企業。等待好消息嘅投資者失望，又再沽貨離場，恒指回試50日線及250日線，成交更縮水至1000億之下，一句到尾，港股缺水情況，由18000展開反彈都無改善過，挾淡倉亦有停止嘅一日，北水買入又賣出，周一淨買入，噚日又淨沽出，根本唔會同你坐定定。散戶更加係心灰意冷，韭菜被割得多，早已轉戰美股，甚至其他市場，跟巴菲特買日股都仲有希望，港股早成棄嬰，上上落落，有波幅，冇升幅，當早前港股重見二萬，古天后已提示反彈浪隨時完結，今日一旦再失守最後防線20日線，睇怕新一輪跌浪又再展開。