點解要搞到咁樣衰呢......
港媽帶著初生嬰兒光顧，堅持要買學生餐。設計圖片
不少食肆都有出售學生餐，為穿校服者或能出示學生證的學童提供優惠。有食店員工近日在社交網站投稿，分享自己曾遇過貪小便宜的食客，當中一名港媽帶著初生嬰兒光顧，稱要買學生餐，被要求出示證明時，竟然發難稱「我小朋友咁細個，唔係學生係咩？佢唔通返工咩？」，店員不禁慨嘆，「其實主套餐同學生餐價錢相差唔算多，點解要搞到咁樣衰呢」。
設計圖片
該名員工在facebook專頁「西客之道」投稿，指自己在一間牛肉飯專門店打工，曾遇過一名推著BB車的港媽要求購買學生餐，樓主見狀禮貌詢問「小朋友係邊到？」，港媽聞言突然情緒激動：「有無搞錯啊，咁大個小朋友都睇唔到？」，樓主見BB車上的嬰兒仍未識行路，於是答：「學生餐要學生証或者著住校服先買得」，惟該名港媽發難稱「我小朋友咁細個，唔係學生係咩？佢唔通返工咩？」。
樓主無奈下向經理求助，經理隨即表明會跟公司規矩行事，更反問該名港媽「學生餐係學生食既，賣比學生既，你個小朋友...就算真係我賣個牛肉飯比你，你個BB都食唔食到啊？你個大人買個主套餐啦！」對方聽完即黑面走人。
樓主又分享另一次經歷，指一對父女要求買學生餐，但由於女童未有身穿校服，亦無帶學生證或學生手冊，於是未能成功購買。該名父親隨即發惡並大講粗口，「我小朋友咁細唔係學生係咩？」、「規矩係死既，人係生既！」，該名父親更直接站在收銀台附近，指著樓主不斷高聲大罵，連其女兒也被嚇倒，哭著說：「爸爸，我唔想食啦，我哋返屋企啦！」
其他食客見狀亦出言勸說：「你積下口徳得唔得啊，句句粗口教壞晒小朋友」，惟該名父親反駁：「我點教女關你乜野事啊」，食客隨即回應：「你教壞你個小朋友都算，你教壞埋在場所有包括我個小朋友，點解唔關我事？人哋都講到明要校服或者手册先買得，好心你唔好咁難睇，仲要嚇到自己個女喊成咁，你個女好慘啊！」。該名父親聞言才停止大鬧，黑著面重新排隊。
樓主又稱：「上面公司規定咗嘅嘢，你對我哋班前線員工發脾氣都冇用。其實主套餐同學生餐價錢相差唔算多，點解要搞到咁樣衰呢？」，他續說「你係要拗個學生餐既，咪乖乖地跟規矩著住校服或者帶學生證／手册囉。婆婆著住校裙既，賣個學生餐比佢又有咩所謂！比你係人情，唔比你係道理啊！」
帖文獲不少網民力撐，大讚樓主及經理做得好，斥責事件中兩名家長行為失禮，「問返個家長，咁你個bb依家讀緊邊間呀？」、「貪小便宜嘅人真係無處不在」。
