麥玲玲大爆老公刻意挑選「平民餐廳」作首次約會撐枱腳地點,但吃迴轉壽司吃到她扯晒火,而自命「魔高一丈」的玲玲姐則在與老公約會時選看三級恐怖片!
《玲玲友情報》9月6日晚一集主題是「出Pool」,「唔玩風水玩吹水」的麥玲玲請來戀愛教練Angus分享工作上遇到趣事,還找來J2er黃紫恩(Jojo)、胡美貽(Nicole)和蔡景行(行仔)齊齊吹吓愛情水。
![今集主持有(左起):胡美貽(Nicole)、黃紫恩(Jojo)、玲玲姐和蔡景行(行仔)。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報01_source-licensed_.jpg.webp)
今集主持有(左起):胡美貽(Nicole)、黃紫恩(Jojo)、玲玲姐和蔡景行(行仔)。
從事愛情配對工作的Angus,經常遇到客人提出騎呢要求,有一次一位在美國矽谷做IT的男士,想找一位樣貌和身材俱值95分的女士做女友,豪氣表示能令對方衣食無憂之餘,每個月更可送上名牌手袋做禮物,玲玲姐聽罷大笑:「抵佢冇女朋友,你唔可以覺得個個人都黐住個價錢牌,講感情架嘛!」Angus又謂曾遇過有男士以「處女」為擇偶條件,主持們聽畢均勁大反應,並好奇Angus如何替女方驗明正身,Angus還爆出該名男士搵處女背後真正原因,玲玲姐和Nicole聽畢大嘆扣晒分,到底係乜?
![戀愛教練Angus。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報04_source-licensed_.jpg.webp)
戀愛教練Angus。
![戀愛教練Angus大爆另類顧客另類擇偶條件。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報10_source-licensed_.jpg.webp)
戀愛教練Angus大爆另類顧客另類擇偶條件。
玲玲姐之後亦自爆遇過不少有奇怪擇偶要求的客人:「我有個客話一定要搵個女仔鍾意食餃子,有個女仔就話個男仔一定要返著西裝嘅工!」玲玲姐開心Share完還忍不住警世地感嘆謂:「條件你自己Set啫,但真正遇唔遇到係另一回事。你Set到條件好高時,先望望自己,要求愈高,成功找到心儀對象機會就愈低。」
![睇Jojo同Nicole嘅反應,就知節目內容幾咁驚爆啦。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報06_source-licensed_.jpg.webp)
睇Jojo同Nicole嘅反應,就知節目內容幾咁驚爆啦。
![大家吹水吹得非常開心!](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報09_source-licensed_.jpg.webp)
大家吹水吹得非常開心!
吹水期間,玲玲姐大爆老公當初擇偶條件亦相當不切實際:「希望將來另一半係超瘦,同埋預佢結婚後肥30%就啱啱好,呢啲就係怕咩就踩咩。」又大爆老公刻意挑選「平民餐廳」作首次約會撐枱腳地點,全因想測試約會女士人品和質素,豈料不但因而一度激到約會對象拂袖離座,玲玲姐亦吃迴轉壽司吃到扯晒火:「好麻煩,食住嘢都要不斷TUN位,嘩!真係想打人,好彩我個人唔現實啫。」自命「魔高一丈」的玲玲姐,又自爆首次跟老公約會節目是睇三級恐怖片,而且老公竟比她更驚青,相當驚爆!
![玲玲姐同老公第一次約會就係睇三級片。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報11_source-licensed_.jpg.webp)
玲玲姐同老公第一次約會就係睇三級片。
![搞到Jojo非常愕然!](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報12_source-licensed_.jpg.webp)
搞到Jojo非常愕然!
![玲玲姐第一次同老公嘅約會餐廳係迴轉壽司。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報17_source-licensed_.jpg.webp)
玲玲姐第一次同老公嘅約會餐廳係迴轉壽司。
![仲話老公揀平民餐廳作為首度約會地點背後有重要原因。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報18_source-licensed_.jpg.webp)
仲話老公揀平民餐廳作為首度約會地點背後有重要原因。
![Jojo聽完之後都話學到嘢。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報19_source-licensed_.jpg.webp)
Jojo聽完之後都話學到嘢。
![玲玲姐話佢想打人時,個樣都係笑笑口,果然係開心果。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報20_source-licensed_.jpg.webp)
玲玲姐話佢想打人時,個樣都係笑笑口,果然係開心果。
節目中,Jojo和行仔更會鬥自揭及被揭單身真相,當中以Jojo最為不堪入目,自覺只是因「要求高」要出Pool無望的Jojo,竟遭工作人員圍插「太麻甩、太嘈、樣衰、成日亂噏、頭大身細、胸唔夠大、太過性感及講嘢太快」,Jojo事後不但大方承認「全部都啱」,更揚言為了要出Pool決定封嘴。
![Jojo同行仔都係單身。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報02_source-licensed_.jpg.webp)
Jojo同行仔都係單身。
![Jojo仲畀工作人員圍插佢點解單身。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報03_source-licensed_.jpg.webp)
Jojo仲畀工作人員圍插佢點解單身。
![對於被工作人員圍剿,Jojo不怒反笑。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報21_source-licensed_.jpg.webp)
對於被工作人員圍剿,Jojo不怒反笑。
![仲揚言為咗出Pool,今後要封口添!](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報23_source-licensed_.jpg.webp)
仲揚言為咗出Pool,今後要封口添!
Nicole則自爆與另一半撻著主因通常是同樣「瘋癲」:「我做嘢比較癲,咁我有一個係因為賽車,一個係因為夜蒲,然後玩到好癲冇Feel變有Feel。嗰兩個男仔都畀人覺得係癡線佬,咁啲人就覺得我係癡線婆。」想知更多成功約會要素?第一次約會應該約幾點?去邊度?記住留意《玲玲友情報》。
![Angus話Jojo同Nicole係屬於同分類型,到底點解呢?](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報08_source-licensed_.jpg.webp)
Angus話Jojo同Nicole係屬於同分類型,到底點解呢?
![玲玲姐對於Nicole嘅瘋癲論,聽到皺晒眉頭。](https://image.bastillepost.com/1200x/wp-content/uploads/hongkong/2023/09/20230904_EN_玲玲友情報14_source-licensed_.jpg.webp)
玲玲姐對於Nicole嘅瘋癲論,聽到皺晒眉頭。