李幸倪林奕匡再合作與動畫角色一同成長 廖子妤首獻聲被姊妹情感動

《魔髮精靈：夾BAND天團》今個秋天繼續以新舊經典流行歌曲貫穿全片，又唱又跳賣狂笑！將於11月23日粵、英語配音版同步上映！

環球影業發行、夢工場動畫炮製大電影《魔髮精靈：夾BAND天團》（Trolls Band Together）屬系列全新第三集，原裝英語版Anna Kendrick聯同Justin Timberlake回歸獻靚聲；本地粵配版除了上兩集火花四射的李幸倪（Gin Lee）、林奕匡（Phil）人氣掌舵聲演「寶寶」和「阿班」外，更請來廖子妤（Fish）和周祉君好戲加持，為觀眾迎接連場充滿動感的勁歌熱舞彩虹之旅！

《魔髮精靈：夾BAND天團》日前舉行首映禮。

齊齊玩遊戲。

與小朋友合照

與第一集相隔七年，唔經唔覺來到電影系列的第三集《魔髮精靈：夾BAND天團》，是日在黃埔天地舉行首映禮，Gin同Phil 再次合作為電影配音。二人提到七年前其實也是第一次為動畫配音，Gin表示：「當然係好開心！除咗配音，《魔髮精靈》咁多集都分別會有唔同主題，帶俾觀眾快樂、感動。重記得當年第一次配音，用咗好幾日時間先完成，來到今集大概半日就配好，感覺到自己有進步；而寶寶（配音的角色）由第一集要人抱抱、到第二集講共融，來到今集講親情⋯⋯希望呢個故事可以繼續落去，睇到寶寶結婚生BB，都希望有機會一路配落去！」

廖子妤、林奕匡、李幸倪

Phil接續說：「係超開心呀！可以繼續為阿班（配音的角色）配音，唔覺意就七年，嚟到第三集，有共同成長嘅感覺！」至於新加盟《魔髮精靈》這個大家庭的Fish，更是她入行以來首次為電影配音！「第一次幫電影配音覺得好好玩，一路配嗰時好似同花花（配音的角色）一齊冒險，要大嗌、大笑等等，好有趣！」

如Gin所講，每集《魔髮精靈》都圍繞不同主題，帶出不同的信息，今集所提及的正是親情、兄弟姊妹情！現實生活中有兩個親妹妹的Fish和有一個親姐姐的Gin在戲中分別聲演失散多年的姐妹花花和寶寶，兩人基於自己的成長背景，對今集特別有共鳴，聲演姐姐花花的Fish表示：「我有兩個親細妹，感情一直好好，特別同大妹年紀較近，細個一直都係『雞啄唔斷』，兩個妹細個時礙於我威迫之下，成日要陪我玩角色扮演，更喺屋企扮露營；所以今集講到花花遇番寶寶之後又會幫佢紮頭髮，又會為咗妹妹而跳出自己嘅安全地帶，轉換係我都一樣會為妹妹咁做！」

至於同戲中一樣都係妹妹的Gin，同樣覺得今集好有共鳴。「細個同姐姐會一齊唱歌、玩，同埋我地臨瞓前會互相講故事俾大家聽，都會一齊迷偶像同聽歌，直到而家同屋企人關係都係好close！」 而戲中聲演最細佬的Phil，現實中亦是弟弟，他說：「我好開心有個哥哥，一直以嚟佢都係我嘅榜樣，多數都係佢takecare 我！而離鄉別井喺香港，我都好慶幸有班兄弟陪伴，除咗打波、吃喝玩樂，有事嘅時候都係義無反顧，好似之前我要搬屋，佢哋知道就即來幫手，當然同樣地我都會咁對佢哋！」

大合照

與觀眾分享。

Gin Lee李幸倪推出全新歌曲《新牌仔》，這次新歌為大家帶來「成長」課題，歌詞繼續由黃偉文（Wyman）操刀，作曲方面，則由Gin跟好友馮允謙（Jay Fung）、陳考威及黃銘一起創作。

Gin推出新歌《新牌仔》。

觀看相關影片按連結：https://youtu.be/fA7rKkQcfbQ

原來「成長」這個主題，一直在Gin的袋中藏着多年，「我記讀大學嘅時候，有一日我個同班同學同我分享佢屋企嘅嘢，話點解佢爸爸會係咁？我就突然間有一個諗法，同佢講：『其實你爸爸都係第一次做爸爸㗎咋，可能有好多嘢佢都係學緊，你唔好怪佢啦，可能佢之前做得唔好，但經過嗰次之後佢有嘗試補救、有嘗試做返好，不如你原諒佢或者俾多次機會佢。』」

Gin分享成長的故事。

Gin謂小時候總覺得大人應該甚麼都會，長大後才知並非如此，「有時候佢哋會犯錯或者唔識，所以人生就係要不停學習，冇人永遠都一百分。」她續說：「人生去到唔同嘅階段，分唔同嘅工，每一個階段做嘅每一個選擇，當時可能會令到你不知所措、會令到你覺得好難嘅一啲新嘅課題，但你要去學。」

Gin指小時候總覺得大人甚麼都會，但長大後才知並非如此。

「苦候」多年，終於迎來這首歌，Gin直言是Timing、是緣份。她跟Jay Fung認識多年，閒聊間也會提到寫歌，但一直未有行動，直到今年二人合作拉闊音樂會，再次提起作歌，終於成事。Gin大爆《新牌仔》本來是不存在的，「我哋原先寫咗另外一首歌，好順利寫完之後，大家覺得好似仲有啲精力、仲有好多諗法，仲可以去創作另外一首歌，當時我好興奮，『我有個諗法！』跟住我就成個故事講咗一次俾大家聽，大家好有感覺，佢哋都覺得呢個題材有趣，《新牌仔》就喺咁嘅情況下誕生。」

作曲由Gin及好友Jay Fung合作。

而歌詞就再次找來Wyman相助，Gin坦言歌詞有很多擊中她的小心臟，覺得這是Wyman給她的一份小禮物，「首先一定係父母嗰一part，佢知道我同屋企人感情好好，我好想孝順父母，但可能有啲時候做唔到，因為自己要離鄉別井追求自己想要嘅嘢，歌詞有句『但對父母親 別提及傷口』；第一句『大踏步 踏出氧氣罩』都好有感覺，因為我係七星女，唔足月出世，一出世就要瞓氧氣箱一個月先可以出嚟。」

歌詞再次找來Wyman相助。

MV方面，Gin跟導演麥曦茵是首次合作，找女導演是希望透過女性的敏感度，感受girl's talk，然後再用她的方法將感受呈現於MV中。籌備拍攝前期的工作，Gin表示發送了很多段audio note給導，她笑言全部至少有四十五分鐘，將自己由出生到現在的每個重要時刻都跟導演說了一遍，「講晒我成個人生比佢聽，我已經特登講好快，哈哈，我自己已經x咗2㗎啦，至少！呢個其實係一個幾得意嘅過程，因為我同導演係之前係完全未見過面，但係佢彷彿認識咗我一生。」期間更講到喊，她也說自己始料不及，「講到某個位講唔落去，stop咗先，然後開始喊。隔咗五分鐘我平復咗再繼續，我真係估唔到會講到自己喊，我諗導演都有嚇親。」

MV方面，Gin與導演麥曦茵是首次合作。

MV其中一個場景是禮堂，Gin表示感受特別深，「我係一個好容易好大壓力嘅人，記得有一排我好大壓力嘅時候，我每一晚都發同一個夢，就係發夢考試！夢入面我係『死啦冇溫到書呀』、『呢一科唔熟呀』、『唔記得晒啲嘢呀』真係好驚！但MV嘅情景係唯美嘅，我就諗返起求學時期好開心同同學一齊打排球、食嘢、傾偈、田徑，係溫馨嘅，一定唔係考試嗰part，哈哈。」

MV中禮堂的場景令Gin感受特別深。