J2主持文頌男發長文透露心聲 冇覆DM被鬧令關心變成負擔

Koba直言：希望可以畀多啲空間我

主持J2節目《不正常愛情研究所》的主持文頌男（Koba）在去年12月確診罹患罕見的尤文氏肉瘤（Ewing's Sarcoma），現已停工休養正接受治療。一直樂觀抗病的Koba經常會在社交平台分享其抗癌點滴，但近日他發長文透露心聲，表示感謝大家的關心之餘，卻成為了負擔。

自揭有大概6×6×4cm的惡性腫瘤在椎間近盤骨附近位置，是罕見病症

一直在樂觀抗病

Koba抗癌起一直收到網民的關心，但他感歎：「自從我病咗之後，好似由感謝大家，變咗服務大家。」他透露收到源源不絕的DM，他明白每個人都想收到回覆，自己亦都很努力地一一回覆，但有部分網民沒收到回覆就會在直播上鬧他：「我知大家都好想同我做朋友，而其實我都好歡迎同大家做朋友，我都嘗試盡量回應晒大家嘅DM，尤其一啲有用嘅資訊，我係好感謝大家提供畀我。奈何實在太多太多嘅訊息，我實在冇辦法回復得晒，尤其是最近呢排每日都痛，根本分散唔到注意力去回覆大量嘅訊息，喺到同大家講句唔好意思，我知道大家都好熱心好關注，我已經收到大家嘅心意。我當然好歡迎大家發訊息畀我，但我未必可以回覆得晒，而儘管我未必可以及時回覆，我都會盡量睇晒大家嘅DM。」

Koba抗癌起一直收到網民的關心

但漸漸覺得自己像是在服務大家

他亦表示自己已經很努力接受大家的建議：「大家畀咗無數咁多、唔同嘅建議我。有啲人又話某啲嘢唔好食，有啲人又話某啲嘢應該食。我食親啲咩都話唔應該食，好似就嚟冇嘢係可以食，就嚟係咩都唔食得。咁我到底應該食啲乜嘢呢？大家建議我食素、戒呢樣戒嗰樣，我都只能夠盡量執行，同我屋企人講聲不如煮呢啲啦。」

他亦表示自己已經很努力接受大家的建議

Koba最後不忘感謝大家：「最後，我真係好感謝大家對我嘅熱心同關心，除咗收到你哋嘅捐款之外，仲有一啲膳食補充劑去幫助控制我嘅病情，冇你哋嘅支持我未必可以走到嚟而家呢一步，我對於以上種種嘅支持同關懷表示感激，多謝大家！同時都希望大家可以畀多啲空間我，體諒一下我。同病魔搏鬥係好辛苦、好困難嘅一件事情，希望大家繼續幫我集氣，打倒呢個大魔王！」
 

一直積極治療的Kona無奈病情反覆，13日晚他的社交平台更新了他離世的消息。

J2節目《不正常愛情研究所》主持文頌男（Koba）去年12月公開患上罕見癌症「尤文氏肉瘤」（Ewing's Sarcoma），一直積極接受治療的他無奈病情反覆，13日的夜晚，文頌男的IG突然更新，宣布死訊，終年29歲。

J2主持文頌男

自揭有大概6×6×4cm的惡性腫瘤在椎間近盤骨附近位置，是罕見病症

一直都在積極治療

他的社交平台更新了他的死訊：「好抱歉，喺呢度要同大家講一啲好沉重嘅事。當大家睇到呢一篇文章嘅時候，我已經離開咗人世。

呢幾個星期以嚟，我一直努力接受自己身體上嘅變化。呢段時間，我選擇咗唔對外透露自己嘅病情，亦冇同任何傳媒交代，因為我未有勇氣去接受呢啲變化。

其實，早喺2024年6月22號，我就因為下半身完全癱瘓、完全郁唔到、冇任何知覺而入院。呢個情況亦令我排唔到尿，所以當時要緊急送入醫院。

自從入院以嚟，到我撰文呢一刻（2024年7月10號），已經接近三個星期。唔好講病情冇好轉，反而越嚟越差。胸口以下仍然係完全布知覺，完全控制唔到排泄功能，需要換尿片同埋插尿喉。癌細胞已經擴散去好多唔同嘅位置，例如胸、肺、多個脊椎、淋巴，甚至有啲腫瘤我可以喺外部摸到。有知覺嘅地方都感覺24小時都好痛，例如肩胛骨、頸椎、頭皮。

我仲有氣促，心跳長期偏快，依家要吸氧。每朝早都會有發燒嘅感覺，不過量體溫就量唔出發燒，而且仲會覺得好凍，但就出曬汗，身邊嘅人感覺我發緊熱。

醫院已經開咗好多唔同嘅藥畀我，不停調整劑量，雖然有抑制到大部分症狀，但仍然都係好辛苦、好唔舒服。

醫生同我商量過，再做康復治療都冇作用，只能夠做一啲舒緩性治療，見到有咩症狀就做相應治療抑制住佢，等我過得冇咁辛苦。簡單嚟講，依家就係等緊死，純粹希望死得舒服啲。

喺人生嘅最後一哩路，非常感謝親友同各界人士一直以嚟嘅支持同關心，呢段旅程有你哋陪伴，我感到無比幸運同感激。」

宣布離世