退休轉行做演員?
金管局總裁陳德霖下月起退休,咁退休後有乜搞作?或者可以諗吓在演藝界玩票演出!因為金管局最新推出的宣傳短片,就由陳德霖粉墨登場擔演一角。
金管局為加強與公眾溝通,繼去年推出facebook專頁後,昨再推Instagram專頁,並趁機推出一系列以「保護個人數碼鎖匙」為題的網上宣傳短片,短片找來《愛.回家之開心速遞》中飾演大小姐一角的林淑敏擔正外,還有陳德霖粉墨登場客串一角,這個演出組合都頗有新鮮感!
短片故事大綱講林淑敏所飾演的大小姐,如何在日常生活中不小心網購及使用免費WiFi,導致信用卡及數碼鎖匙被盜,其中一幕陳德霖「撩女仔」主動坐埋大小姐身邊惹來「抄牌」疑雲,其實他是想話畀大小姐聽佢串數碼鎖匙被偷,並引導大小姐要「換鎖」做好網上保安。
陳德霖今次演出,Kelly認為有啲生硬,始終臨時演員都係演員,都要用心演出㗎,要好似周星馳在電影《喜劇之王》所講,要發揮俄國導演斯坦尼斯拉夫斯基提出演內心戲精髓,即「由內、至外、再返內」,咁至夠入戲嘛!