跟邵美君學戲參演微電影獲讚賞 黃淑蔓包辦作曲主唱電影歌《I am All Alone》

黃淑蔓首次為電影作曲，亦邀請到她非常欣賞的音樂人SHIMICA合作，她直言是成就解鎖！

「寰亞孻女」黃淑蔓（Feanna）最近參與第11 屆微電影「創＋作」 支援計劃（音樂篇）項目，演出吳詠琪導演「專業組」微電影作品《深房 l am not alone》做女主角，為提升演技，專程跟舞台劇演員兼戲劇導師邵美君學戲，獲益良多。此外，Feanna更為電影首次作曲，邀請SHIMICA合作最新單曲《I am All Alone》，感激她與團隊協助，成就解鎖。

Feanna為電影首次作曲，推出最新單曲《I am All Alone》。

觀看相關影片按連結：https://youtu.be/Nr3t0fgKEA0?si=olQonhDQ6Ymh4R0F

Feanna說：「好開心，今次可以參與『第11屆微電影創＋作支援計劃（音樂篇）』，再次與今次微電影《深房》導演吳詠琪（琪琪）合作，亦因為今次project，我有機會出一首歌。而且係我第一次作曲，好開心邀請到我非常欣賞嘅音樂人SHIMICA一齊寫歌。我一直都好想同佢合作，所以第一時間諗到佢，立即邀請，佢爽快答應。」

Feanna好開心邀請到她非常欣賞的音樂人SHIMICA一齊寫歌。

邀請過程順利，連創作過程都很順利，Feanna說：「第一次參與作曲我好緊張，以前我自己一個試吓作曲嘅時候，成日好擔心旋律上做得唔好，搞到個過程拖得好慢。今次多謝A&R嘅同事Viki Chan，陪我一齊去SHIMICA嘅錄音室，我哋諗到旋律就立即寫低和試唱，仲要多謝當晚幫我哋伴奏嘅Howard。創作過程中，我搵到一個平靜嘅自己。雖然之前會緊張，但以我嘅樂理知識，加上事前跟導演了解劇本，將自己對故事嘅感受放入旋律。」

Feanna透露邀請過程順利，連創作過程都很順利。

新歌《I am All Alone》曲風有別於Feanna過往青春活潑類型，亦改變了唱法。她說：「呢首歌充滿力量，跟我過往嘅唱法好唔同，係我好喜歡嘅音樂風格。可能大家都停留喺我年紀小嘅時候，發放青春可愛活潑感覺嘅歌曲，其實我已經成長，希望大家見到成熟咗、穩重咗、突破自己去咗一個新階段嘅黃淑蔓。」

觀看相關影片按連結：https://youtu.be/6yd1I0hvlc4?si=5biNTPkXmD9VNgp6

不斷追求進步的Feanna，拍攝微電影《深房》之前，特別跟著名戲劇導師邵美君上演戲班，她說：「今次電影裏有好多來自隔籬鄰舍和樓上嘅撞擊、嘈吵聲音，但其實拍攝嘅地方好寧靜，我要靠幻想去演，然後發現原來我缺乏想像力。多謝邵美君老師教我好多演戲方法，刺激咗我喺演戲方面好多新想法。」她透露第一堂就被邵老師激發，情緒崩潰。她說：「我好喜歡邵老師嘅說話：『演戲冇分對與錯，每個人表達情緒嘅方式都唔同。』因為我過往錯誤認知，以為情緒演繹有標準，我要達到指標。其實只要代入情境和角色，自然地做出嚟就啱。邵老師啟發咗我好多，令我更加勇敢去試不同嘅表達方式。」

Feanna特別跟著名戲劇導師邵美君（左）上演戲班。

Feanna透露第一堂就被邵老師激發，情緒崩潰！

得到高人指點，Feanna演技進步神速，微電影上架後，獲讚有驚喜，她感謝琪琪導演陪伴上堂，還有整個拍攝和音樂創作團隊，她說：「佢哋畀咗好多指引和方向我，令我喺創作路上不孤獨，充滿力量！」戲中除了邵美君老師客串一角，還有飾演Feanna前男友的鄧家杰（Kakit）。她說：「Kakit同時亦演出今次項目另一位參加者嘅作品，多謝佢抽時間過嚟幫手，佢好專業、好熱血。拍戲嘅時候，佢仲展示咗佢嘅折骨舞技，現場睇都幾震撼！」微電影和最新單曲的MV都已在YouTube上架，Feanna表示希望大家喜歡她的新嘗試。

鄧家杰飾演Feanna前男友。

得到高人指點，Feanna演技進步神速，微電影上架後，獲讚有驚喜。

鄭伊健在演唱會上為小師妹黃淑蔓特別安排唱她的新歌《I am All Alone》。

「凍齡男神」鄭伊健日前帶埋小師妹「寰亞孻女」黃淑蔓（Feanna）到澳門，於MGM美高梅劇場舉行「Together 鄭伊健與你在一起音樂會」，全場爆滿，觀眾熱情衝到台前，伊健又唱又跳又握手，還向觀眾拋紀念品，氣氛High爆！

鄭伊健日前在澳門MGM美高梅劇場舉行「Together 鄭伊健與你在一起音樂會」。

音樂會由兩位結他手演奏打頭陣，伊健升上台唱《Beautiful Day》揭開序幕，他與舞蹈員勁歌熱舞《極速》和《全城效應》，全場觀眾站起來一齊跳舞，澳門歌迷，還有香港及各地歌迷都揮動燈牌，氣氛熾熱。伊健向台下觀眾揮手打招呼，「好耐無見，我見到你哋呀！」然後他介紹音樂監製陳光榮，「今日唔只係『鄭伊健Together音樂會』，仲係一個音樂調查會，你哋知唔知我呢個朋友係邊個？佢就係陳光榮。（台下歡呼）我幾乎所有歌都係佢寫，佢除咗寫歌畀鄭伊健，仲係一位作曲家。我嘅歌、好多歌手嘅歌，仲有電影音樂，例如《古惑仔》、《風雲》，我以外嘅電影例如《無間道》啦！」全場尖叫！

伊健向大家介紹音樂監製陳光榮。

伊健問觀眾：「香港電影好睇，香港嘅電影音樂都好好，若然陳光榮開電影音樂會你哋會唔會睇？」台下大叫「會」，伊健問點解？觀眾大叫「有你」，伊健笑說：「可能仲有梁朝偉和劉德華呢！」陳光榮拍拍心口感謝觀眾支持。

兼漏口風陳光榮開作品展。

伊健邀請陳光榮、小師妹Feanna、歌手朱雋言與樂手們到台前一同演唱《For U & Me》和《心照》，觀眾反應熱烈，衝到台邊握手。繼香港紅館和美國站演出之後，今次是Feanna第三次擔任伊健演唱會的表演嘉賓，深得大師兄寵愛，獲驚喜安排在演唱會上獻唱其新歌《I am All Alone》，她清唱其中一段作為與伊健合唱《蟲兒飛》序曲，靚聲震攝觀眾，掌聲如雷。

伊健邀請陳光榮、小師妹Feanna、歌手朱雋言與樂手們到台前一同演唱。

接著，伊健換了新造型演唱《發現》、《同一秒》和《吻感》等情歌，觀眾揮動手燈，全場一片星海，非常浪漫。然後氣氛一轉，舞蹈員帶著紀念品出場，伊健一邊唱《Together》一邊向台下觀眾拋出紀念品，全場High爆！

伊健與舞蹈員一同登場。

一邊唱《Together》一邊向台下觀眾拋紀念品。

演唱會尾聲Encore時，伊健笑問觀眾：「你哋想聽歌定握手架？」台下起哄。他演唱《友情歲月》、《甘心替代你》、《只會因你唱》和《我的歌》等經典金曲後，笑說：「你哋都係鍾意握手多啲喎！」最後他唱《自動勝利Let’s Fight》來回舞台左右兩邊跑，滿場飛與觀眾握手，演唱會在熱鬧氣氛下圓滿結束。

伊健滿場飛與觀眾握手。

演唱會後台，Feanna接受訪問，「好開心再次跟伊健哥哥到澳門演唱會做嘉賓，今次係我出咗新歌之後第一次參與演唱會，伊健哥哥好好，喺我完全唔知情之下，綵排嗰陣安排我加入新歌，幫我諗埋出場環節，希望觀眾聽到我現場唱《I am All Alone》時會開心。」跟伊健巡唱表演，Feanna最難忘美國站，「因為我第一次去美國，當然都係第一次喺美國表演，當時逗留咗兩個星期，除咗演唱會之外，大家都有帶我出去玩，竟然可以將工作建立喺玩樂上，係一件好幸福嘅事。我好想去更多地方，可以唱歌畀唔同地方嘅人聽。我成日問伊健哥哥下一站去邊度唱？佢唔肯講，話到時會通知我！」

伊健為Feanna特別安排唱她的新歌《I am All Alone》。

Feanna為新歌發揮創意，「多謝大家鍾意《I am All Alone》呢首歌，為咗回饋大家嘅支持，我同好朋友喺Donut Demo研發咗一款新口味和新造型嘅冬甩，名命『I am not a 窿』，期間限定。有我好鍾意嘅元素，包括貓仔和士多啤梨味，希望大家買呢款冬甩，一邊食一邊聽我嘅新歌。」問她是否地獄廚神？她哈哈笑說：「我到目前整過嘅食物都唔難食，亦未出現恐怖料理，其實我又唔算成日整嘢食，因為我好懶。之前在英國讀書自己一個人嘅時候會煮中菜，因為好掛住香港嘅食物，依家返咗嚟有媽咪煮，我好少自己下廚。我會考慮做一日店長，仲可能會整冬甩畀大家食，希望大家個肚仔無事啦！」

Feanna透露為新歌發揮創意，與好友在Donut Demo研發了一款名為「I am not a 窿」的doughnut。

大合照