上期講到人生要聚財，最好係趁樓價低時買樓，可以供樓方式逼自己儲錢。但依家樓價太貴，買唔到樓啦，就建議大家買股票，成個概念係有錢不斷儲在一些有長線升值空間的投資產品。
stock market
陸羽仁素來唔喜歡講冧巴。就算講，都係指數基金股，輸你唔死嗰種，因為股市千變萬化，講完一個冧巴怕你瞓咗身，佢變咗我又唔得通知你，害咗你。上期講聚財時都提過兩個冧巴做例子：越秀房產信託基金（405）同招商局中國基金（133），點解揀呢兩隻基金，主要的原因係佢地股價相對資產值有一定的折讓，買佢有少少著數也。由於篇幅關係，上次未有講關於這些冧巴的風險。今期先講風險，後講建議。
先講405，由於越秀房產信託基金最大的資產係廣州IFC，買佢等如買了廣州IFC的部份樓面，兼且有人幫你管理，幫你收租。至於風險何在呢？你買咗廣州物業，最大的風險當然係中國經濟唔得啦，中國唔掂，廣州當然唔會掂。另一個風險係，就算中國經濟得，廣州會唔會落後於其他城市呢？由於越秀房產信託基金的主要物業都在廣州，我覺得唔可以忽略呢個資產太集中的風險，尤其廣東省十多年前發展得好快，近年開始放慢，在未來10年的發展速度，未必追得上其他省市。不過，我覺得其風險度只屬中低。如果中國爆煲，其實買乜股都死，廣州的獨特風險唔係好高，故些可以話405相對比較穩陣。有人擔心越房阿媽會注入另一大舊資產財富中心(和廣州IFC差唔多咁大)，要發股攤薄股權，我認為將來只要財富中心的作價唔貴，注資發新股唔係問題。
另外，有一點我上期沒有提到，好多人指出買樓有槓桿，三成首期，七成按揭，即係用3元買緊10元嘢。其實買越秀房產信託基金都有槓桿。槓桿有兩個，第一，係折讓，佢嘅市賬率(股價相對資產淨值的倍數) 0.62倍，即係用62元就買得到值100元的貨；第二係佢內藏借貸，越秀房產信託基金共有借貸119億人仔，變相有個五成樓宇按揭藏在公司內。
換一個角度講你地會易啲明，或者將買405比作買樓，佢總資產246億人仔，等如306億港元（人仔對港幣匯價1.244港元），現時佢股票總市值101.7億港元，股價等如總資產的33.2%。換言之，同買樓的概念一樣，你放低33.2%資金，就買到廣州IFC嘅100%資產嘞，同借錢買樓一有咁大槓桿。所以呢隻股票可以放大些注碼睇長啲。
至於招商局中國基金就比較富爭議性。上次由於篇幅有限，未有詳細同大家講。點解折讓會咁大，市賬率PB(股價相對資產淨值的倍數)只有0.4呢？遠比越房的0.62倍PB低。主要原因係招商局中國基金嘅資產中有中誠信託，佔了總資產值21%，或者9.4億人仔。中誠信託無上市，在國內搞了不少信託業務，呢啲信託等如代客發債集資。由於經濟轉差，好多貸款人出現財務危機，幾隻差不多爆煲的信託都係中誠信託做嘅。
正因為咁，好多人怕中誠爆煲133呢9.4億中誠股份化為烏有，睇淡133，股價低迷，令佢折讓加大，佢過PB多數在0.5至0.8倍之間，而家跌到得0.4倍。加大了的折讓一定程度反映了持有中誠信託股票的風險，至於夠唔夠頂，就見仁見智啦。我認為呢隻股票的風險程度屬中高。買入佢之後如果中誠信託無事，佢的上升空間更大，係風險和回報都成正比例的事情。133的另一個問題係投資集中金融業，曝露在呢個行業的風險中。
不過，如果你只想低風險的話，咁就忘掉133。可以置換成恆生H股
ETF（2828），或者匯豐中國翔龍基金（820）。820係閉端基金，主要投資中國註冊的A股、B股、H股和紅籌，持股相當分散(可看其中期報告第28頁http://goo.gl/WQTmKb)。風險唔算高，亦有番一定折讓。翔龍基金2007年上市，一度炒得好癲，市值去到總資產值溢價81%，呢幾年輾轉回落，變番有折讓。至5月14日，市賬率跌到0.78，有22%的折讓。折讓細過133好多，但勝在安全啲。恆生H股ETF同翔龍基金，無獨特風險，風險只在中國經濟的盛衰。
如果你係厭惡風險一族，可以將七成資金買405，其餘三成放在中國股票基金股，再要安全一些的話，可以放棄133，只買2828或者820都得。
以405為例，股價或有起落，但你當買寫字樓商場，唔使太短視，慢慢蓄貨，有錢嘅時係就買，收到息又投番入去，等如分段買樓，慢慢聚財。
陸羽仁
** 博客文章文責自負,不代表本公司立場 **
近呢幾年，股市上上落落，唔生唔死，搞到心情好鬱悶。最近與舊朋友聚會，當中不少都係事業有成的中產，薄有身家，席間講起投資，大家都感歎，唔知有乜好買。
在座有個律師，他以前係半個炒樓專家。有錢就買樓，待價而沽，買一開二，炒得都幾過癮，但近呢兩年投晒降。原因係政府打擊樓市，推出雙倍印花稅，貴價少少嘅樓都要俾8、9%稅，加埋1%經紀佣金，使費接近10%，即係買入即升10%都無肉，短期轉讓，仲要加稅。咁嘅情況，炒家、半炒家都無得玩，只有退場一途。
另一位朋友係老師，她保守好多，從來都唔鍾意炒買，前幾年股市旺場的時候，買吓股票，但都「蟹咗」，近年買股甚少出入，另外做吓人民幣存款，賺少少利息。
大家傾起，都人到中年啦，究竟有乜嘢，可以作為較長線嘅投資呢？有人問起，買基金好唔好？我認為基金其實都有好嘢，但唔係有研究，多數唔識揀，普通人買基金都是「瀨嘢」多，原因是專買一些流行基金。例如呢期興炒金磚四國，基金公司就整出一大堆金磚四國基金，賣晒廣告，散戶就買金磚四國基金；呢期話利息跌債券得，基金公司又搞債券基金，佢哋又一窩蜂去買債券基金。不過，唔知大家有否留意，一個熱潮唔會維持好耐，一兩年就過晒。在座有位朋友係人事經理，話自己唔炒嘢，但係買埋一大堆流行基金，我問佢知唔知那些基金是搞乜東東，佢連個基金名都講唔出，只知道有啲係新興國家基金，有啲係債券基金，講基金公司名就更加講唔出啦。
唔少人都係咁，唔想炒股，就買基金，我覺得都幾弊，因為這類基金熱門，都係在那種產品熱門時搞基金，入貨價自然高，係買呢啲基金等如經常摸頂買貨，基金公司賣完一浸熱門貨，就閃人去搞下一個熱門概念。之前搞落的基金不同熱門，未必找最好的芬佬去管，但你仍然每年要俾管理費2至3%。買貴嘢之餘，仲俾人抽水。所以話，唔識走去買基金做長遠投資，唔係一個好方法。
我覺得比較好嘅方法，就係揀個大方向，低價買入，不斷聚財。原本經濟ok樓價較低時，買樓投資，係最好嘅聚財方法，因為買樓有槓桿，放低三成買咗十足資產，只要入貨價唔計，供十零年成舊資產都係自己，仲可能會升值。不過依家樓價貴，已經行唔通。同學反覆問我，樣樣嘢都好似唔得，究竟邊樣至得呢？
我叫大家先諗一個問題，估估中國經濟在未來十年八載，究竟得唔得？如果覺得係得嘅，就趁低價買些與中國經濟相關的資產。如果唔睇好中國經濟，覺得歐美掂啲，就買歐美資產。關鍵係先抓住一個大方向，然後每當佢低價時就入貨，長期持有。大家要留意嘅係呢種方法講就易，做起來頗難，因為期間必然出現波動，一般人唔係咁易把持得住。
我不妨舉兩個我認為可以「聚財」的例子給大家參考。如果你認為中國經濟長遠係得嘅，可以考慮越秀房產信託基金（405），現價3.62元。佢喺廣州擁六個物業，但最主要資產係廣州IFC。越房市賬率只有0.619倍(即股價對資產淨值的比率)，你買佢，等如用緊62折買廣州IFC呢舊資產，平咗38%，有一個唔錯的安全閥。但記住！記住！記住！要有心理準備，雖然資產有折讓，股價仍然係有下跌的可能。大市唔好，佢股價仍然會跌。不過，如果長揸5、7、10年，蝕錢的機會唔會好大，大家唔好忘記，每年還有接5至7厘息收。
另一隻招商局中國基金 （133）, 現價10元，息率4.7厘。折扣就更誇張啦，市賬率0.395，四折都唔夠。佢嘅資產主要係金融股、招商銀行、興業銀行和中誠信託加埋佔佢54%資產，其餘有26%是文化傳媒，其他資產包括能源、製造、科技、醫藥及地產等（資料詳情見
http://goo.gl/2u9HJm）。惟一的缺點係資產比較側重金融業。市道熱的時候，基金炒得好貴，市道唔掂的時候，基金就出現好大的折扣。招商局中國基金市帳率仲低，得0.39倍，即係39折，平咗61%！有咁大個折讓頂住，都算有安全空間。不過，又係嗰句，記住！記住！記住！大市唔好股價仍有機會下跌。但佢跌得愈深，就更加抵買。
買這些股票，等同用平價買了廣州頂級寫字樓，或者多間大銀行及媒體的股權。由於折讓有相當，除了較安全外，亦變相有一定嘅槓桿比率，例如招商中國基金，等如放低近四成錢，就可以買十足資產。有錢又不妨可以買少少，可以做到聚財的效果。到樓價跌番到咁上下時，又可以沽咗佢地去買樓。
講到風險，好多人怕風險去存人仔，大家千奇唔好以為咁就完全無風險，因為中國經濟一旦崩潰，人仔一樣會大跌。大家睇好人仔匯價，即係對中國經濟前景有信心，買越秀房產信託基金同招商局中國基金，豈不是一個更好嘅投資？
溫馨提示：大家記住唔好睇完呢篇文章，就去狂掃貨。股票可升可跌，長線投資買股票，唔可以心急，睇定啲，慢慢見低位才買，贏面會大啲。另外買股票要留有餘地，不宜瞓身，呢啲都係郁得好慢的股份，不用心急進攻也。
