霸戲哥深信每一個人，無論你家財萬貫，抑或聰敏過人，都會遇到失敗。當然失敗定義可以好廣，有人可能係溝唔到女，有人可能係讀唔成書，亦有人係真真正正down to earth，隨時翻唔到身。
今晚播出嘅J2節目《就算得你一個觀眾》，故事主人翁「烘焙兄弟」就試過去到呢個地步。兩兄弟拍住上打江山，憑住努力賺到第一桶金。後來接手台灣蛋糕品裨做代工，生意越做越大。最風光試過月入過百萬，擁有30名員工。點知遇人不淑，畀生意夥伴出賣，被拖數過百萬，銀行戶口得番個位數，連買煎釀三寶都唔夠錢……
霸戲哥雖然未試過山窮水盡到呢個地步，但都經歷過沉重失敗，差啲一蹶不振，而療傷嘅過程亦好漫長同痛苦，實在難以啟齒。
《就算得你一個觀眾》呢個節目都幾特別，能夠畀一啲有經歷嘅人，透過舞台劇演出，去抒發情緒。唔好睇少呢個情緒窗口，有時宣洩完出嚟，世界從此不一樣。
霸戲哥
** 博客文章文責自負,不代表本公司立場 **