54歲的歌手杜德偉（Alex）與相差24年的太太李曉冰（Ice）結婚三年半，成日溫馨放閃。日前下午，Alex與嫩妻現身筲箕灣食Tea，杜太當日胃口勁好，食完碗麵、油菜，再同老公share份鮮油多，離開時，發現杜太略發福、頸巾遮肚孕味濃，而丈夫對她更加呵護備至，扶實上車。其後本報電話訪問Ice，問她是否造人成功？她無否認說：「遲啲有消息再講！」似怕「小器」密冚初孕一事！
年過半百的杜德偉，12年11月娶細自己24年嫩妻Ice，婚後原本打算二人世界唔生仔，其後又轉軚話做完演唱會就生BB。近年，Alex已開行turbo「造人」，仲話向好友梁家輝、曾志偉和狄波拉等攞生仔秘方。惜太太肚皮無聲氣，搞到Alex沒好氣回應：「未生啊！順其自然，我好努力㗎啦！」
點擊看圖輯
更多相片
日前下午三時，美魔男戴cap帽穿花tee一身潮童打扮，帶30歲愛妻去筲箕灣王林記食Tea，兩公婆order一碗牛腩麵、鮮油多、油菜和熱咖啡等，只見杜太食唔停口，一口氣清晒碗麵，再食兩啖油多。及後發現記者，被撞破撐枱腳的杜氏尷尬相視笑笑，唔敢再食，抹嘴走人。杜太怕羞彈開，側面睇，頸巾下驚現微隆小肚。此時，Alex九秒九行番愛妻身邊，攬住太太定驚。不過人夫全程笑唔停口，心情極靚，好有古怪，加上連太太上落一級都要穩陣扶持，Ice又以平底鞋、頸巾遮肚，中晒初孕象徵！
其後問是否陀B？她竟緊張追問來源及無否認說：「吓！邊度收到料㗎？我都知自己上鏡好肥！?家未有消息喎！有好消息會公佈。(是否未過三個月，怕小器？)未有住，杜生好努力㗎！(咁恭喜定你兩夫婦先！)勉強接受先！多謝晒！」似有還無，不過Alex兩夫婦已積極狂吸有機和營養食物補身，隨時ready生BB啦！
