*

霸戲哥之日常#360| J2監察站(24):MK仔女

噚晚J2嘅《關注關注組》,討論「MK仔女衣着大選」,一眾主持Juliana、何泳芍、Jessica同Clevis齊齊以MK look亮相,最後Jessica以齊蔭頭配大眼con勝出,成為MK王者。

新冠疫情持續咗兩年幾,霸戲哥同豬視妹都唔知幾耐冇去過MK,對上一次去條街都冇乜人,想搵個MK妹昅吓都難。

霸戲哥都年輕過,但本身對MK文化唔太熱衷,所以唔會模仿MK仔嘅衣着,仲有啲鄙視添。當年嘅MK仔,大多受《古惑仔》電影影響,喇叭牛仔褲加條鐵鍊吊吊揈,配件窄身開胸裇打出個排骨胸同鍍金嘅鍊,哪裏來的自信先着得出街?

20年前嘅MK仔,好彩啲嘅都做咗人老竇/阿爺啦,今日當然收歛晒。不過嗰陣麻甩味係好難搣甩嘅,大家不妨留意吓,依家着住對crocs周街走嘅中坑,20年前九成九係MK潮童。信不信由你。

霸戲哥

** 博客文章文責自負,不代表本公司立場 **