【港姐2022】邢慧敏為好姊妹林鈺洧奪冠感高興 望日後有機會挑戰拍劇做主持

賽前大熱的「友誼小姐」13號邢慧敏則三甲不入。

被問到覺得哪部分表現失準，邢慧敏坦言：「其實我真係唔知自己邊part做得唔好。行catwalk就難我唔到，我難得開口講嘢嘅應該係自我介紹同埋玩遊戲。玩遊戲嘅時候，講得唔好或者發問都唔好，都有機會（影響賽果）。」不過，每位佳麗都有自己擅長的地方，邢慧敏就對行catwalk十分有自信：「在rehearsal嘅時候，其實幕後工作人員都同我講話：『其實好多同事都覺得你係行得最好㗎！因為有台型，成個感覺、速度都好好。』」

邢慧敏為好姊妹林鈺洧奪冠感高興。

總括而言，邢慧敏對自己參選以來的表現都滿意：「都滿意。喺入面我同好多女仔相處。其實我本身唔係特別多女性朋友，因為我本身男仔頭性格。但係（參選港姐）就真係識到一班好真嘅朋友，好多女仔其實都傾到計，尤其是Denice（林鈺洧）。喺入面識咗個背景同自己差唔多，性格差唔多、高度差唔多，甚至係職業都差唔多嘅人。所以我覺得喺呢個比賽入面，識到一個好朋友已經好難得。」邢慧敏更指兩人感情好好，私下會一齊逛街：「 好多人都覺得我同Denice Friend話：『無可能啵，你哋唔係競爭對手咩？』但其實唔係，真係好Friend依家。」

林鈺洧同邢慧敏好Friend，之前做賽前節目都有公開多謝邢慧敏支持。

邢慧敏為好姊妹Denice奪冠感到開心：「我啱啱後台見佢入咗五強，跟住之後問問題答問題嘅時候，我啲眼淚就係咁標出嚟。咁佢見到我嘅時候，換衫時都話：『你唔好喊啦！』佢自己都喊，但我叫佢：『唔好喊唔好喊！快啲出嚟！」

邢慧敏好SWEET呀！

邢慧敏是模特兒出身。被問到比賽之後，是否有意挑戰拍劇及當主持？邢慧敏道：「其實都想挑戰。因為畢竟先前做平面Model比較多，即係影硬照。有機會其實都想試下拍戲。咁主持方面，其實我而家唔知呀，好似啱啱大家所講會唔會係真係我口才唔係咁叻呢⋯⋯咁如果真係做主持嘅話，可能需要多啲時間去training一下。」