剛宣佈「無限期休息」的謝安琪（Kay），首部主演劇集《殭》，雖然收視和口碑強差人意，身為女主角的Kay，剛完成演唱會即全力宣傳，勇於面對外界負面批評，盡顯女強人一面。Kay「夠薑」本色，早在出道初期已顯現，當年公開跟張繼聰拍拖；之後事業如日中天又奉子成婚；到今時今日登上天后之位更突然「無限期休息」，只為做個好媽媽、好太太、好女兒和好媳婦，此等勇氣不是人人能有，小小負評又怎會難到「夠薑」的她。
以休假心情宣傳新劇的Kay，顯得更加容光煥發。
今次Kay拍劇，源於兩年前無意中跟監製陳維冠（Joe）認識，「嗰時老公生日前夕約咗Joe傾新劇，嗰晚我同朋友想畀個驚喜老公，好冒昧打電話畀Joe，問佢介唔介意配合我哋一下，嗰時佢都被迫出席埋個生日會。當時佢已經同我講，嚟緊有套講殭屍嘅劇想搵我，年幾後佢再搵我，咁啱我又有個十年計劃，想試啲未試過嘅嘢，於是就決定拍。」
入行以來Kay拍過6套電影，但孭飛劇集始終是首次，演藝出身的老公張繼聰當然是最佳私人指導老師，但阿聰近期劇接劇，於是Kay請來被指是她和老公「小三」、出爐「金像獎最佳男配角」白只任導師，「佢真係好好，開拍前已經同我做咗好多準備功夫，佢咁啱又唔使休息，可以全程跟住我開工，係最尾去荷蘭外景先至去唔到咋！」
對於被批評樣假，Kay覺得被踩演技更可惜，「我個樣講咗好耐啦！反而我真係想大家睇到我有用心做，嗰時自己又要兼顧其他演出，試過連續10日瞓得一個鐘，所以真係好佩服長期拍劇嘅演員，真係靠意志。（老公都係其中一個？）係呀！終於知道佢有幾辛苦啦！（咁講法會唔會冇下次？）應該都係，自己體力上未必應付到。」
網上圖片
不止劇集可能是最後一部，要再聽宣佈「無限期休息」的Kay新歌，亦不知等幾耐，但Kay強調出發點完全為家庭，絕非跟經理人不和，「真係因為小朋友已經到咗一個思想轉變嘅年紀，佢會突然間問我『其他小朋友係咪因為我係張繼聰同謝安琪個仔先同我做朋友㗎？』，係需要花更多時間去同佢溝通，呢個階段錯過咗，就永遠都追唔番。」
資料圖
看到Kay的清爽新短髮，好自然聯想到「有喜」，她即笑着說：「真係因為熱咋！不過，以往工作關係，公司想我留長頭髮，可以多啲變化。（Keep住「女神」形象？）唔係咩女神唔女神！休息咪可以剪短啲囉！其實生BB，真係上天畀我哋嘅禮物，老實講，我下年生日都40歲，要有BB唔係容易嘅事，順其自然啦！」