*

upload_article_image

KellyChu - 保安局年初一搞問答遊戲 送出8隻紀律部隊得意熊｜Executive日記

保安局與民同樂，同大家分享喜悅。上年聖誕，當局已經喺facebook專頁搞過一次問答遊戲，送出三隻紀律部隊熊仔，反應熱烈，當時小編仲話一定會有下次。估唔到話咁快機會又嚟，原來當局年初一又會送熊仔啊，今次仲要加碼齊晒八隻（見圖）！啲熊仔咁得意，Kelly都好想要啊！

保安局facebook專頁噚日出post，「小編豚隊」指佢應承過大家，下次送熊仔一定唔止三隻。今次特登找數，仲搵齊八隻紀律部隊熊仔，同大家開箱，拜個早年。八隻熊仔分別係：「忠誠勇毅 警察熊」、「救災扶危 消防熊」、「專業高效 飛行熊」、「精益求精 入境熊」、「熱誠傳承 有心熊」（代表醫療輔助隊）、「服務社會 民安熊」、「百年傳承 懲教熊」同埋「護法守關 海關熊」。八隻熊仔都着上各自紀律部隊嘅制服，真係好可愛，好想帶晒佢哋返屋企！

「小編豚隊」話，保安局facebook專頁年初一又會送熊仔，「真係新春送大禮」，仲話如果反應熱烈可能會送多幾隻，又叫大家記住年三十要密切留意保安局facebook專頁。小妹已經Mark好日子落日曆，你呢？
Kelly Chu

往下看更多文章

decor