古天后日誌｜接近二萬水平為港股建倉理想切入點

2023年02月22日09:00 最後更新: 10:42

2月22日，天晴乾燥，早晚較清涼，日夜溫差較大。隔晚美股表現疲弱，主要係10年美債息升至3.96%，意味住下月加息幅度或者唔係0.25%而係0.5%，加息憂慮引發市場不安，悲觀情緒帶動下，三大指數齊齊跌逾2%，標普跌穿4100首個支持後，正邁向下一支持3900。由於CPI及PPI嘅回落速度不似預期，加上美國雖不至陷入衰退，但有機會呈向橫向發展，咁喺現水平嘅美股，經過兩三個月反彈後，自然值博率大減，入場資金亦減少。另上標指升至4100-4300水平開始見阻力，而之前回補空嘅買盤亦完成，自然美股回吐壓力增加，不過美股暫時又唔見得會出現急跌，標指跌至3900水平，應該有一定支持。

自11月美股帶領全球股市反彈，市場一直憧憬通脹回落，息率回落，甚至期望今年減息。不過喺中國開關後，資源價格已逐步回升，如此一來，通脹無乜可能大幅回落，美國嘅核心PCE要回落至聯儲局期望水平2%，機會都好低。所以對於今年下半年減息，古天后一直抱懷疑態度，目前睇嚟今年放緩加息已經要開香檳。