古天后日誌｜現水平買貨已有一定防守性

2023年02月27日10:06 最後更新: 10:50

2月27日，天晴，天氣乾燥，早上相當清涼。上周五美股又復下跌，主要係PCE強於預期，三大指數跌逾1%收市，標指重返4000水平之下。美股近日回落，當然係同息率回升有關，而息率回升係由於通脹降幅不及預期，息率高企下，股票回報自然無咁吸引。通脹遲遲未能加快回落，主要係油價跟資源價格回升，美國1月PCE按年升5.4%，高於前一個月嘅5.3%，通脹唔單止未見加速回落，反而回升，除咗係資源價格回升之下，薪金增幅保持強勁，個人消費開支亦錄得環比增長1.8%，反映喺高通脹之下，個人消費意欲未受影響。

個人消費未受影響，反映美國經濟情況唔算差，本來擔心美國經濟陷入衰退機率下降。不過咁嘅情況下，聯儲局最在意嘅通脹自然無法加速回落，目前10年債息回升至3.93%，美匯指數亦重上105，資金相對變得保守，而上周五反映市場恐慌情緒嘅VIX見23，仍較12月高位25.8高，而虛擬貨幣亦未見大幅回落，市場熱錢未見大舉撤退，暫時美股可視為回調，大跌機會唔大。