3月9日，大致天晴，局部地區能見度較低，日間天氣溫暖。隔晚美股個別發展，係道指跌咗58點，標指跟納指都見反彈，標指暫時守住3900，市場似乎已消化早一晚鮑爺嘅鷹派言論，即使隔晚公布嘅小非農強過預期，市場反映都唔算太大，等埋星期五嘅大非農公布，再睇美股會有乜嘢反應。
周三小非農就業人數達24萬人，反映就業市場仍然強勁，其中酒店業增加8.3萬人，金融服務就業人數增加6.2萬人，製造業亦增加4.3萬，商業服務增3.6萬人，反觀運輸業表現較差，經過1月份強勁增長後只增長3000人。數字反映服務需求正在增加，似乎招聘出現困難，令到薪金年增長率保持在7%以上，短期睇唔到上升趨勢有變化。就業市場強勁，正好支持聯儲局繼續行緊縮貨幣政策，鮑爺放鷹亦變得合理。
鮑爺喺前晚放鷹，表示息口高位將較預期高，市場開始推算3月議息或加息0.5%，但隔晚被問及幾時停止加息，又未見佢斬釘截鐵畀到個肯定答案，同時亦透露3月加息幅度並未有定案。呢啲舉動，難免令人覺得聯儲局喺度出口術，打壓市場炒作商品市場，以壓止通脹因為資源價格上升而繼續走強。除咗周五有大農數字，下周亦會公布2月CPI，一旦出嚟嘅結果反映通脹繼續回落，唔排除市場對息口走勢睇法再度逆轉。值得留意係九成標指企業已派成績表，表現唔算差，全年盈利可望保持增長，明年盈利增長有望進一步提升。而今年美股回購金額可望提升至1萬億美元新高，呢啲購買力都係支持美股推升股價嘅動力，呢個亦係古天后對美股唔會睇得太淡嘅原因之一。
港股呢個星期走勢逆轉，再度回復弱勢，資金集中炒作直播帶貨股份，單係電視廣播(00511)兩三日間股價已急升兩倍有突，噚日就連香港科技探索(01137)都因為炒直播帶貨急升。其實直播帶貨係咪可以為公司帶嚟巨額收入，大家心中有數，只要睇返兩年前上市熱炒嘅快手(01024)，當年亦係熱炒直播帶貨概念，股價一度高見400元水平，但股價由當年高位累跌超過八成，若然直播帶貨真係咁好執，快手股價又點會落得如此下場，概念炒作只屬一時，市場最終都要回歸理性，內地直播平台多如天上繁星，電視廣播如何面對咁多競爭，炒作嘅嘢見好要收，參與其中見唔對路最緊要識跳車。
6月20日，天氣炎熱，部份時間有陽光，間中有幾陣驟雨。隔晚美股休市，歐洲股市見回吐，但跌幅唔算嚴重。美國國務卿訪華，雖然連習大大都見咗面，但中美雙方會面後未見聯合聲明，雙方關係只能算打破僵局，但談不上完全破冰。由於內地經濟表現於開關後，復甦不似預期，經濟面未能支持人民幣強勢，人仔喺上周五反彈後，周一又回復跌勢。
內地國常會結束，未見有任何重大刺激經濟政策出台，618購物節成績未見突出，噚日ATMJ開市未幾即下跌，跌幅全線超過3%，之前一直強勢嘅快手(01024)更跌半成。下半場傳出習大大將會見布林肯，港股由低位反彈，呢啲重磅科網股跌幅亦收窄，帶動港股跌幅削半。
618購物節成績如何，喺各電商未有公布銷售金額下，大家都心中有數，應該唔會好得去邊，否則早已打鑼打鼓，高調宣布銷售數字。相比喺疫情之前，每當有呢類銷售推活動，唔使十個八個鐘，又話打破去年銷售紀錄，近呢三年已再無呢支歌仔唱。
不過大行對電商股都算客氣，指目前內地消費力弱，電商平台銷售產品以平價貨為主，總收入有啲啲增長都已超過預期，表現唔錯，繼續睇好。不過報告睇好還睇好，但身體最誠實，噚日未見資金入場掃電商股，主要係官方無實際銷售數據公布，大行報告都係避重就輕，電商實際整體營收表現如何，市場一清二楚，當然唔會賣賬，尤其電商如京東(09618)大灑金錢補貼進行推廣，即使谷得起個銷售額，但薄利都未能多銷，拖累整體盈利表現，電商補貼戰難以持久，相關股份經過一輪反彈後，市場面對618購物節亦不感興趣，未見資金入場追貨。
恒指噚日回吐逾百點，但收市跌幅已較盤中低點跌幅削半，雖然未能企穩20000大關，但暫時守住19800關都算係咁。不過成交額又回落至1030億元，反映場內資金面薄弱，買盤未見積極，大市都係由期指主導，指數上上落落炒波幅。人民幣雙櫃台買賣，雷聲大，雨點小，呢個都係古天后意料中事。講嚟講去，港股由18000水平反彈至今，一直未見資金配合，除咗係技術反彈同挾淡倉外，講唔上係乜嘢回復強勢。留意反彈未能企穩100日線，若再失250日線及50日線，本輪反彈好大機會結束，只係6月份好友得勢，未必會放過淡友，回調至19500水平或者又守住，假如去到期指結算後，仍未有任何好消息配合，唔排除大市再次調頭向下，坊間唔少聲音指上月低位已見咗全年低位，似乎係有啲過份樂觀。
