3月15日，日間部份時間有陽光，日間溫暖。隔晚美股反彈，中小型銀行擠提總算有個方法解決，加上2月CPI合符市場預期，市場目前傾向相信下周聯儲局即使加息，都只會加0.25%，甚至有三成預測可能暫緩加息。道指升336點，標指重上3900，升64點，納指則升239點。隔晚夜期跟ADR亦隨美股回升，今日預期港股可以反彈。
早兩日當坊間唔少人不斷指SVB引發嘅事件，擔心演變為2008年金融海嘯2.0，但古天后已指出兩者分別，而今次聯儲局跟美國政府火速成立保障存款基金，穩住市場信心，而今次嘅銀行資產質素相比2008年亦好好多，只要市場信心回復，唔再持續擠提，短暫流動性問題自然解決。
SVB瀨嘢，需要拆骨賣資產，滙控(00005)就以1英鎊收購SVB嘅英國子公司，不過有消息指滙控需向SVB UK注資約190億港元，令其股價噚日插水。滙控向SVB UK注資，係要確保其可保持業務運作，不過市場關注呢190億可能只係個開始，未知日後有冇需要投入更多資金，會唔會因此影響派息。估計喺呢個情況之下，滙控即使今日隨大市反彈，股價短期要重返58-60元水平有難度。
不過經過SVB事件後，美國聯儲局正審議一系列更嚴格嘅資本及流動性要求，並擬加強年度壓力測試措施，有關規定或重點針對資產規模介乎1,000億至2,500億美元嘅中型銀行。估計未來數月聯儲局將提出一系列改革建議，可能要求更多銀行喺其監管資本中顯示投資產品未實現收益與損失，而此舉將會影響銀行監管資本充足率，不過有助增加銀行本book嘅透明度。
暫時SVB事件對市場影響已減到最細，美股亦因為炒住息口快見頂而回升，至於港股守住100日線反彈，能否重上19900回補裂口仍屬未知數。始終港股面對嚴重缺水問題，喺缺乏新資金流入下，港股即使有反彈，亦無力推升，尤其係外資自去年內地嘅監管風暴後，開始對港股敬而遠之，有短線炒作亦只係小打小鬧，大大小小嘅資金愈炒愈短線，如此一來，港股偶有急升挾倉，但無人肯坐貨睇長線，個市一挾上人人鬥快走人，邊有動力級級上向上，頂多都係上上落落，難以走出悶局。
