古天后日誌｜銀行危機有望解決市場焦點重返息口走勢

2023年03月28日10:09 最後更新: 10:17

3月28日，多雲，間中有幾陣雨，早晚天氣清涼。隔晚美股仍反覆，不過SVB跟Signature Bank成功拆骨出售，而且售價亦未至於太賤價，銀行業務都仲係值返啲錢，帶動銀行股反彈，道指最終升194點，標指則升6點，暫時守穩3900水平。不過銀行危機略為退減，債息有所回升，科技股又面臨壓力，納指則倒跌55點收市。

FDIC宣布以165億美元收購SVB價值720億元貸款業務，尚中包括SVB借畀客戶嘅貸款，以及560億美元負債，亦即SVB嘅戶客存款，即係FDIC係有可能面對560億存款被提走問題，不過FDIC已承諾擔保銀行有足夠流動性。至於貸款部份為720億美元，客戶若按時悉數清還，減去560億美元負債，即FDIC所收購嘅業務淨資產值為160億美元，FDIC以165億美元收購，其實等於無折讓，反映SVB手上資產其實係有價有市。SVB成功出售業務後，聯儲局即表示SVB爆鑊只係中小型銀行一個管理不善嘅個別例子，並非整體流動性出現任何問題，並表示日後將加強對中小型銀行嘅壓力則試。