3月30日，大致多雲，間中有幾陣雨，未來一兩日天氣將回升。隔晚美股做好，市場憧憬國會推出新存款保障方案，金融股做好帶動大市向上，道指升323點；標指之前落到3800之前有支持持續反彈，隔晚升至4000水平之上，升56點，納指則升210點，似乎無懼債升回升。
隨著銀行危機退去，市場更關心5月是否加息，週初市場還估計美聯儲仍會以通脹為要，5月再加0.25%，不過若然4月通脹數字回落，5月停止加息機會仍然存在。即使鮑爺之前講咗話今年之內唔會減息，不過要完全解決銀行危機，增強銀行資產負債表先係長遠解決危機嘅方法，要銀行資產負債表加強，停止加息甚至提早減息，先係有效方法。
市場氣氛逐漸回復，資金再度risk on，資金繼續尋找機會，虛擬貨幣回升正好證明呢一點，而人民幣離岸價亦回升，似乎有資金東來，但睇真中港兩地股市成交，似乎兩地股市未有受惠，雖說噚日港股成交回升至1400億樓上，但指數喺20000水平，成交額隨之向上係合理，但上周當大市回落至19000低位，成交額不過1000億左右，明顯低位進場資金有限，本周回升不過係好友係結算前盡最大努力，將指數挾高嘅把戲。好友於月中不斷推升中字股以托住指數，但那邊廂淡友則大力沽空ATMJ去質低指數，直至前日好友拋出阿里(09988)震撼旦，將大市推升至20000水平之上，今日期指結算，好友能維持指數喺20000水平都未叫反勝，頂多係減少損失。經過3月呢一役，好友其後仲有乜嘢法寶可以將指數維持喺20000水平之上，古天后唔敢講，只係一個欠缺成交配合嘅市場，升勢可以有幾持久。
停咗牌超過一年嘅泰加保險控股(06161)近期動作頻繁，公司主要股東吳宇重返董事局並擔任主席，拋出一系列方案，包括捐贈一間海外綜合保險公司予上市公司，同時注資2億港元，以及發行40億債券發展海外保險業務等，為公司復牌創造有利條件。自其全資附屬公司泰加保險被清盤後，公司股份已經停牌超過一年。根據港交所上市規則第13.24條，上市公司需具備充足業務運營及資產支撐，方能繼續上市交易。因此，泰加保險控股嘅一連串舉措，無疑是為咗儘早滿足呢啲，實現復牌。
過去幾年，最為矚目嘅停牌公司肯定係康宏，深圳幫跟台灣幫之間互鬥，輾轉三年慘被取消上市地位，最終受苦嘅都係一班無辜小股東，一生積蓄血本無歸。呢啲事件，無疑對本港國際金融中心地位都會產生負面影響。相較之下，泰加事件複雜性較低，主要股東吳宇一方嘅管理層態度更為積極正面，而接連嘅救援行動，亦為公司復牌帶嚟新希望，目前市場關注焦點在於吳宇捐贈嘅阿聯酋保險公司Himalayas Insurance能否迅速實現發展。
目前，中阿合作已成為2023中國經濟走出去嘅重要一步，隨著愈來愈多中國企業跟阿拉伯地區企業合作，必然帶來大量金融、保險需求及商機。泰加今次抓住機遇，主動出擊佈局中東地區保險業務，搶佔先發優勢，正正係其整體戰略佈局嘅重要一環，拭目以待泰加最終能否成功復牌，咁一眾小股東亦翻身有望。
