食客揚聲點餐無人理 茶記阿姐被拍膊頭即發爛 網民意見兩極

食客光顧堅尼地城茶記，揚聲點餐但無人回應，於是離位以摺扇拍女侍應膊頭，阿姐反應令食客感到不滿。

有食客光顧堅尼地城茶記，揚聲點餐但無人回應，於是離位以摺扇拍女侍應膊頭，豈料阿姐反應超大高呼「入咗單啦」，令食客感到不滿。(「香港茶餐廳及美食關注組」FB圖片）

該食客於Facebook群組「香港茶餐廳及美食關注組」發文，表示日前到堅尼地城某茶餐廳用餐，女侍應將水杯放下後繼續前行，而他則隨即揚聲點餐「芝蛋治、熱鴦」，但阿姐完全無回應，令他十分苦惱「阿姐一直背住我，停在另一枱，似在幫另一枱落單。由於一直冇面見我，亦冇任何反應，我唔肯定佢究竟聽唔聽到」。

樓主解釋「你眼尾都冇望過嚟，我唔知你聽唔聽到。」阿姐更大聲回一句「係㗎！唔使望㗎！」(「香港茶餐廳及美食關注組」FB圖片

由於樓主不確定阿姐有否聽到他的點餐內容，他便離開座位，用摺扇輕拍對方的肩膊再講一次「芝蛋治、熱鴦」。誰不知阿姐卻突然高呼「入咗單啦」，樓主則解釋「你眼尾都冇望過嚟，我唔知你聽唔聽到。」阿姐更大聲回一句「係㗎！唔使望㗎！」，樓主大吃一驚，感到極度不滿，直言不想再忍受這種對待「唔想閉翳，離港消費！」。

樓主發文公審該茶記阿姐，反被網民批評無禮。(「香港茶餐廳及美食關注組」FB圖片

此帖一出即引起網民熱議，不少網民反批評樓主無禮「我覺得你唔識尊重人， 人哋忙緊你就唔可以等人得閑先叫人落單咩？ 你仲衝上前去拍人博頭、 可以告你非禮架」、「你拍佢，正常人都火啦」、「身體接觸己經吾啱，重要揾碌紙扇拍人 ，樓主真係要自我反省一下」、「人地幫其他人落緊單，你走去拍人膊頭幫你落單，我係果個呀姐都xx你啦」、「人哋背住你，你同人講野己經係有問題，之後仲要拍人膞頭，你冇穿冇爛行到出去已經算幸運」、「拍膊頭唔係咁好喎，人哋覺得你抽水喎」。

樓主表示用這把摺扇輕拍阿姐膊頭，認為並無不妥。(「香港茶餐廳及美食關注組」FB圖片

有人則認同樓主，認為阿姐態度有問題「亞姐就算唔望對方，一聲收到咪得囉」、「其實重點是個侍應無出聲同客講已下單，講聲就不會個客之後有所謂無禮的行動」、「吾係話要你跪係度賺錢。正常態度就ok架啦！」、「其實如果聽到，應一句有幾難啫」。

有網民亦慨嘆香港服務業質素大不如前「香港已經退化到一日三餐貼錢無受氣要劏雞還神階段」、「依家香港啲飲食業員工好多都係性格巨星，你幫襯佢老細即係搞到佢做多左嘢，當你仇人係正常」、「所以某啲餐廳唔好呻無人食生意差，根本迫人走」、「香港消費要受氣，真係『特色』」、「香港茶餐廳執笠都好正常，因為佢哋自己攞嚟衰」、「世界有幾多地方嘅餐廳可以寸得過香港餐廳」。

帖文來源：Facebook群組「香港茶餐廳及美食關注組」

有業主近日於社交平台分享表示，自己以超過二百萬港元購入一個公屋單位，不料在收樓僅約十天、尚未開始裝修之際，廁所天花即突然有石屎崩塌墜下。

樓主分享慘事。FB截圖

假天花擋下沉重石屎

該名業主在Facebook群組「公屋討論區 - 香港facebook群組」發文，講述事件經過。從其上傳的照片可見，單位外觀看似新淨，但廁所內用以遮蓋的「假天花」已爆開，揭露內裏石屎嚴重發黑、發霉並斷裂。

「假天花」已爆開。FB圖片

「假天花」已爆開。FB圖片

業主心有餘悸：唔死都變殘

墮落的石屎塊散落廁所地面，體積與旁邊的膠椅相若，相當巨大。業主形容，幸好事發時有假天花阻擋，墜下的石屎未有直接擊中人，否則後果不堪設想。他強調：「成幅石屎冧落嚟，冇天花嘅話，真係會揼死人，一塊石屎十幾二十斤揼落嚟，唔死都變殘」。

石屎嚴重發黑、發霉。FB圖片

樓主：「冇天花嘅話，真係會揼死人」。FB圖片

網民拆解原因

事件引起網民熱議，不少留言直指問題核心，認為單位極有可能是經過刻意掩飾的「化妝樓」。網民紛紛留言表示，「好恐怖啊……」、「大把賤精業主，小心！」。亦有網民分析，假天花常被用作遮蓋滲漏、結構缺陷等問題，一旦發現單位內有假天花，必須特別留神，要求查看內部情況：「假天花係用嚟遮醜，一有假天花要睇清楚啲」、「買化妝樓前要三思！正所謂金玉其外，敗絮其中」。