吳嘉禧與李月兒在現實中都曾成為騙徒目標並險中招。
吳嘉禧（Cheronna）和李月兒（Luna）早前有份參演HOY TV資訊節目《東呃西騙》中的不同處境「騙案」，其中Cheronna於兩個短劇中演出兩個截然不同的角色，不但要演被騙的「浮誇歌手」，也加入「騙徒」行列。
吳嘉禧飾演騙徒。
李月兒在劇中演受害者。
雖然Cheronna曾有不少拍攝經驗，不過處境短劇為新嘗試，她直言做「騙徒」非常過癮，「演騙徒好好玩，有幾誇張都得，相反演受害者，因為有好多唔同保險投資計劃要記，而我好驚去記呢啲。」因怕煩的性格，她坦言現實中很少接觸投資︰「因為我唔太認識呢方面，如果放晒手畀人處理，都有機會畀人呃。」
提到現實中有否成為騙徒目標，Cheronna直言差點墜入電話騙案，「 試過收到自稱入境處電話講我出境異常，我就答冇出過境，佢就叫我畀資料佢check 下，我好似有講出自己個名，但我冇話佢知點寫，因為我諗諗下覺得唔對路，既然有我檔案但又點會唔知我資料，我話之後再覆佢，之後就冇再聽佢電話。」
至於自言不太「精明」的Luna亦因為「太好心」被呃過錢，她表示︰「 當時等緊過海巴士，有人問我借20蚊，覺得佢真係冇錢搭車，所以借畀佢，點知佢拎到之後就行左去隔離機鋪，我先發覺畀人呃。雖然係好少錢，但我覺得唔借畀佢，又唔係咁好意思，但原來畀人呃左個心都幾難受。」
Luna又指讀大學時更跟騙徒講半小時電話︰「差唔多13年前，當時冇咁多騙案，同埋好少提醒大家唔好受騙嘅資訊。當時我住大學宿舍，收到自稱入境處電話，其實我唔係好明佢同我講咩，所以唔識答佢，佢就他不斷幫我轉線去警署或其他政府部門，結果同學入嚟同我講騙案嚟，叫我快啲收線。」她笑言因「唔太精明」，所以逃過被騙。
