周禮茂作品展尚餘兩星期開鑼 門票極速售罄感謝樂迷支持

《新城唱好海洋公園音樂會 周禮茂作品展》請來15位歌手演出！

新城唱好海洋公園音樂會 周禮茂作品展》將於6月8日晚假海洋公園怡慶坊舉行，作品展請來15位歌手演出，包括：陳慧琳、楊千嬅、張敬軒、林奕匡、胡鴻鈞、葉巧琳、黃淑蔓、周吉佩、余宗遙、周子涵、黃明德、鍾柔美、詹天文、林智樂及孫漢霖，門票已於早前極速售罄，不少樂迷表示相當期待。

左起：黎莉、周禮茂、程凱欣、周禮茂

新城廣播總經理（節目規劃及頻道運作）朱子昭為Thomas送上蛋糕。

距離開騷尚餘兩星期，周禮茂（Thomas）接受新城知訊台黎莉主持的《搵黎搞村》「好友音樂感」環節訪問，適逢本月26日是Thomas生日，黎莉特別準備了蛋糕提早為壽星仔慶祝，而新城廣播總經理（節目規劃及頻道運作）朱子昭、新城廣播知訊台台長程凱欣，專程到直播室向Thomas送上祝福，眾人大唱生日歌後Thomas即吹蠟燭和許願，黎莉問Thomas大一歲的感覺如何？他笑言：「我唔記得自己生日，真係醒唔起，唔記得又唔會特登去思考佢嘅重要性。」

本月26日是周禮茂生日。

爆當年憑許志安《男人最痛》攞『最佳中文（流行）歌詞獎』 安仔卻上台多謝林振強
Thomas創作了超過七百多首作品，黎莉問他是否會追求獎項？Thomas笑言:「我又未至於會追求獎項，但順便畀我又唔介意。」隨即大爆昔日一件獲獎難忘事，Thomas稱：「當年我憑許志安《男人最痛》攞『最佳中文（流行）歌詞獎』，呢首歌係我非常滿意同用咗好多心血、眼淚寫嘅一個作品，當時大會安排喺最尾頒呢個獎，主唱嘅安仔都有被請上台，佢致詞時話多謝林振強，當時我唔係真係好嬲，只係覺得好笑，後尾安仔都知，嗰刻喺現場好尷尬。」

而在Thomas眾多作品中，有多首歌是他的「禁歌」，每次聽到都必定掀動他的情緒，張智霖的《祝君好》便是其中一首，Thomas表示：「我每次一聽到就會觸動自己神經，或者會唔覺意流眼淚，都係關於過去一啲感情事。」Thomas又透露郭富城推出歌曲《狂野之城》時剛巧陳百強離世， Thomas說：「本來郭富城Book咗場想舉行迷你演唱會，但因為陳百強走咗，我同小美講想做件事懷念陳百強，佢話『好呀，你哋做啦』，佢好體諒。」

周禮茂作品展尚餘兩星期開鑼。

感謝樂迷購票！

詳細內容，請重溫5月24日，早上10:00 – 11:00，新城知訊台《搵黎搞村》節目中「好友音樂感」環節 ，重溫網址：https://www.metroradio.com.hk/MetroInfo/

音樂創作人雷頌德（Mark）近日由英國返港，擔任陳慧琳（Kelly）演唱會音樂總監，同時應梁兆輝（Brian）的邀請，接受新城《One Music Corner壹角樂》錄音訪問；Mark在千禧年代與黎明和Kelly合作，帶領港式電音熱潮，他接受梁兆輝訪問時大爆曾與黎明因創作問題吵架，黎明更帶他到韓國的夜店取經，回港後炮製出多首勁hit的跳舞音樂。

雷頌德（Mark）接受新城廣播《One Music Corner壹角樂》錄音訪問。

左起：梁兆輝、雷頌德、周禮茂合照。

Mark於 2018年與妻兒移民英國，他透露當時在港壓力甚大，「我好需要有自己空間，走嗰時擺到明我要退休，或者我唔要之前壓力，真係好大壓力，辛苦得好緊要，如果留喺香港，我繼續會有壓力，冇得話做少啲，因為我唔係好叻推job，尤其係自己老友。」

雖然近年一直有做音樂，但Mark只能接受沒有壓力的工作，他稱早前Kelly和BIG FOUR邀請他寫歌，要對方給予充足時間，「佢哋要等得，同埋唔係市儈，要畀得起錢，因為稅又高，做親咩都抽咗一大截，咁冇意思，我做咗好似好無謂咁；我唔知依家香港做一首歌咩價錢，總之我就set一個覺得舒服嘅價。」Mark亦不喜歡別人干擾他的創作，「我唔係話唔改動，以前做歌好多人好多意見，唔好搞我，我好憎，你信得我係個監製或音樂人，你就信晒我。」

雷頌德夥黎明帶領港式電音舞曲潮流。

2000年，Mark與黎明一起製作專輯《北京站》，收錄以電子音樂舞曲為主，成為當年熱門港式電音舞曲之一。Mark透露當時的製作過程曾碰釘，「我寫咗一批歌畀佢（黎明），佢聽完話唔鍾意，話呢啲唔係屬於亞洲跳舞音樂，我有拗過，同佢嗌交，佢話『我下個星期去韓國做嘢，你跟我去，帶你去蒲七日』，佢好熟韓國，去feel吓咩歌啲人會出去跳舞，呢七日我摸到一啲嘢，就係亞洲人嘅情緒發洩，同外國人好唔同。」

Mark的事業起點是跟黃霑做配樂，他從霑叔身上學到如何做一位君子。「我學到作為一個創作人或藝人，首先要對人公平，呢個好重要，佢對我好公平，當時仲係小朋友，佢畀個機會我做電影配樂，我負責寫melody，人工每人一半；同埋出埋我個名，永遠都係出黃霑、雷頌德，見人都讚我『呢個後生仔好勁，係未來嘅顧嘉煇』，畀足面、畀足錢，好君子。」Mark續指霑叔永遠只會讚人，不會彈人，「佢唔鍾意咪唔出聲囉，但佢讚得一定係真心，只會扶起人，唔會踩低人。」

雷頌德、周禮茂（右）合照。

雷頌德、梁兆煇（左）合照。

詳細節目內容，請留意 7月19日，晚上9 - 10時，新城知訊台《One Music Corner壹角樂》，網址：https://www.metroradio.com.hk/MetroInfo/