蘋果 iPhone 7及 iPhone 7 Plus 今日開賣，不少「果農」購得新手機後即到旺角先達廣場轉售。大熱的 iPhone 7 Plus 亮黑版大機回收價一度炒至2萬元，不過貨量極少；而細機則已炒燶，部分更跌穿官方價，變相倒蝕。
先達「機舖」不斷調整iPHONE價。
旺角先達廣場不論場內或場外，都有不少手機店和「收機佬」收購 iPhone 7（細機）及 iPhone 7 Plus（大機），亦有不少人問價放機，希望賺返筆。場內有店舖貼出收購價錢，但只有大熱的亮黑版炒得起。
先達廣場內外，果粉全日人頭湧湧。
大機亮黑版256 GB 及128 GB 由今早開賣後已跑出，收購價一直攀升。當中原價8,288元的256 GB版本最受熱捧，收機價由 13,000元一度升至 20,000元，但可惜有價無貨，至傍晚「現真身」後，炒價稍為回落至 17,500元。而次熱的128 GB則由11,000元升至最高15,000元。
i世代負責人勞先生表示，今次開售只有亮黑版有得賺，但場內全日暫只得兩部，「而家好多都未有貨」。至於其他的收購價，勞先生指「暫時無一部能高過原價」。他建議持細機的炒家「退到貨就退，如果退唔到都要蝕讓」，預計平手或要倒蝕；若持有大機的人都應盡快放售，稱「升都唔會真係好誇張」。
而在先達廣場外，有「收機佬」也謂細機大部份都蝕讓，「蝕一百幾十元，兩百元內」。細機256 GB 可「平手」，而大機32 GB 已「冧價」，收機佬稱「（約）6600元只能賺12元，買支烏龍茶應該OK」。他估計明日的收購價會進一步下跌。