混血男團OneUp樂壇搶灘 Bronny認係Yanny迷Oscar冧爆雲浩影

娛圈事

混血男團OneUp樂壇搶灘 Bronny認係Yanny迷Oscar冧爆雲浩影

2024年07月15日 17:00 最後更新：18:52

混血雙人男子組合OneUp加入樂壇！

《全民造星V》去年落幕，當中憑超高顏值備受外界關注的中英混血兒賀邦（Bronny）與中葡混血兒方智弘（Oscar），宣布以二人男子組合OneUp正式出道，他們首支派台歌《Ten Outta Ten》亦剛剛推出，為進軍樂壇打響頭炮！新歌以愛情為主題，講述男方對女方愛得極致，現實中，二人同樣曾經愛得真摯，不過提到心中女神，Bronny直言曾為Yanny陳穎欣著迷，沉醉做追星族！

點擊看圖輯

全新男子組合OneUp

賀邦（Bronny）

首支派台歌《Ten Outta Ten》剛剛推出

Bronny與Oscar在新歌MV中化身深情王子

新歌以愛情為主題

方智弘（Oscar）

混血雙人男子組合OneUp

兩位型男Bronny與Oscar在歌曲《Ten Outta Ten》MV中，化身深情王子，義無反顧地去愛及守護MV女主角，拍攝期間雖然時晴時雨，但無損他們首次以組合拍MV的亢奮心情，不過其中一幕，導演要求二人到6米高「懸崖」取景時，Bronny竟嚇到舉手投降，Bronny指：「導演話要站邊啲，我即刻舉手話搞唔掂，我畏高，坐喺度都感受到高度，何況要企高，之後導演話OKOK，Oscar頂替，希望嚟緊所有工作，有關高嘅嘢都由Oscar做。」

新歌以愛情為主題，Oscar自爆初戀亦曾好像歌曲故事般，不顧一切地愛對方：「故事好切合我嘅初戀，對對方可以話係一見鍾情，無論對方做咩，自己都會義無反顧地去愛。」說到二人心目中的Dream Girl，Bronny坦言喜歡本地女仔，喜歡性格表裡一致、儍大姐感覺：「以前我好鍾意Yanny，曾經都沉迷過追星，對佢有啲鍾情。」至於Oscar則笑言雲浩影令他心動，大讚對方歌聲悅耳，加上可愛笑容，令他驚嘆。對於OneUp誕生，Bronny與Oscar誓要呈現「新」一面給樂迷，Bronny說：「想呈現我哋嘅音樂類型，喺香港嚟講，相對較少將Hip Hop、Rap放於主流音樂，好少每首歌都有Hip Hop元素，但我哋由今首歌到將來歌曲，都會有Rap，而Rap嘅設計會由我負責及親自寫。」Oscar則希望大眾見證自己的進步，他說：「《全民造星V》嗰時自己好冇自信，喺台上攞住支咪都好驚，自從組成OneUp後，有學唱歌、學樂理，仲有苦練結他，其實自己係好鍾意音樂，好想有全新舞台演出畀大家睇。」

往下看更多文章

Nowhere Boys出道10年首辦商場簽唱會主音Van誠邀西洋書法家太太為歌迷寫上款

寰亞音樂五人樂隊Nowhere Boys出道十周年，首次跳出band房，日前在旺角舉行「MOKO x NOWHERE BOYS《Letters of Nowhere》簽唱會」，逾百歌迷捧場，大排長龍。五子表示好夢幻，沒想過Band仔在商場辦簽唱會，他們逐一與歌迷握手和在專輯上親筆簽名，並由主音Van的太太、西洋書法家Wendy題字寫上款，讓專輯更具紀念價值。

台上主持人問Nowhere Boys去年難忘事，結他手Ken說：「最難忘新專輯內好多歌都喺『二樓後座』錄音。」Van解說這是香港殿堂級樂隊Beyond以前的band房，如今已變成錄音室，是一個充滿傳奇和搖滾的地方，希望在市區重建，清拆前爭取機會在「二樓後座」錄歌。琴鍵手漁佬台上爆料，本月30日Nowhere Boys在中環舉行音樂會，將配合專輯四首以信件為題的作品，分為四個章節演出，立即被Van制止繼續劇透。

除了簽和唱，Nowhere Boys更與歌迷玩了兩個遊戲。為配合新專輯以信件做主題，第一個遊戲由歌迷寫信反鼓勵Nowhere Boys，有文字有圖畫，令他們好感動。第二個遊戲由Nowhere Boys做動作讓歌迷估歌名，場面非常搞笑。

Nowhere Boys更打破簽唱會慣例，臨時加入encore環節。Ken笑說：「Band騷梗係有encore！」原定演唱《給失敗者的一封信》及《給勝利者的一封信》兩首歌，他們笑言與觀眾都很任性，成功爭取即興多演唱《給夢想家的一封信》。台上Van說：「呢首歌啟發自歌迷，其實追星係雙向嘅感動。我哋由細到大聽好多唔同嘅音樂，我哋嘅Rock Hero俾咗好多能量我哋，因為佢哋實現咗佢哋嘅夢想，成為咗我哋嘅夢想家，我哋都希望Nowhere Boys將搖滾嘅精神傳承落去。」

簽唱會結束後，Van興奮地說：「真係估都估唔到，我哋會喺商場搞簽名會，仲簽咗兩個鐘！」結他手Ken表示踏入MOKO新世紀廣場回憶湧現，他說：「好多回憶，以前呢度有一間結他舖，我成日去㗎！」鼓手Nate說：「我成日嚟行街食嘢，因為我係鄰居（街坊），好開心今日代表太子嘅居民嚟表演，平時我踢拖嚟，今日著到好整齊。」

Van說：「平時完騷留低同歌迷影相傾偈都係一班人，今日有機會同佢哋逐個相處，例如有歌迷同我講《地球候機室》會喺咩時候幫咗佢。而最開心係聽到佢哋話買咗飛睇我哋30號喺中環嘅音樂會。」他又讚太太勞苦功高，即場為每張專輯寫上款，要請她食大餐慰勞。他說：「如果由我哋寫，只有我哋睇得明，為咗尊重歌迷，一家要寫得好好睇睇。」在太太面前摸了很多女歌迷的手，Van立即解釋：「我都摸咗好多男歌迷嘅手，我哋好想緊握每位歌迷嘅手，多謝佢哋俾咗好多能量我哋。」

你或有興趣的文章

混血男團OneUp樂壇搶灘 Bronny認係Yanny迷Oscar冧爆雲浩影

娛圈事