觀塘線延線下月23日通車，區內居民終於等到「有條鐵」，不過要使用黃埔站，就要留要幾件事。
黃埔站月台。 本網記者攝
黃埔站採用單側式月台設計，一落車就要選定大堂，前往A出口如家維邨、黃埔新邨；或前往B出口如海濱南岸如理大學生宿舍的乘客，謹記要轉左上西面大堂，前往C出口如紅磡渡輪碼頭、黃埔美食坊的乘客；或前往D出口海名軒的乘客，謹記落車要轉右上東面大堂。
本網記者攝
去錯大堂，回頭路程就要行多三、四分鐘。不過乘客要謹記，一旦出錯閘，由於東西大堂非收費區無法連接，就必須經地面折返。
本網記者攝
黃埔站東西大堂各設有3部三合一售票增值機，可以購買車票、八達通增值或者查詢八達通餘額。不過，西面大堂由於面積較小，不設客務中心，但設有4部附有視像服務的自助客務機（2部閘內、2部閘外），可以處理乘客各項疑難。
本網記者攝
人有三急？洗手間設置於東面大堂，乘客如在西面大堂想去洗手間，需要落月台，步行一分鐘，再上東面大堂。
黃埔站只有一面月台，列車停站後不會回車廠，直接開往調景嶺方向，所以忘記下車都不用怕。 繁忙時間以何文田站終點的列車為約2分鐘1班，黃埔終點站的列車就要4分鐘1班車，去黃埔站的乘客就要留意，以免「搭錯車」。
