每逢放假不少港人都會舉家外遊度假，不過近日有網民在網上撰寫「警世文」，逐一列出同父母一齊旅行的18件麻煩事，並語重心長勸告大家，「唔好同父母去旅行」，貼文曝光掀起網友熱議。
示意圖片
不少孝順仔女獨立之後都會考慮帶辛勞一生的父母旅遊，然而代溝亦是無法跨越的鴻溝，在觀念差異前，儘管面對家人亦鬧得相當不愉快。該網友力數同父母外遊的各種「罪狀」，並狂呻「做咩咁睇唔開」要走去帶父母自由行，事主又指自己其實幾年前已經「衰過一次」，但由於隔得太耐唔記得「上一次的教訓」，所以今次「再衰多次 」，並發誓不會有下次，以免傷親情。
示意圖片
事主列舉「唔好同父母去旅行」的18大原因：
1. 佢想睇嘅野永遠都唔講清楚，到去左就話悶，唔想睇
2. 你估佢想睇嘅野，佢都話唔想睇，一路行一路比面色，催你走
3. 就到爸爸就唔到媽媽，永遠有一個人唔開心，行行下就鬧交
4. 唔可以行咁多路，唔可以係咁搭車，唔可以太新潮，唔可以太老餅，唔可以cheap，唔可以貴，唔可以唔啱佢心水，唔可以悶
5. 永遠只可以你就佢地，唔可以做任何你自己想做嘅野，路過見到扭個蛋會比人鬧，行入夾公仔機會比人拉返出去
6. 佢問你想買咩其實都係問下，唔會聽唔會理，最後以佢自己為主
7. 去日本，一開始食韓國野比人鬧做咩食韓國野，食泰國野比大鬧食泰國野，到食左兩日日本野，又開始嫌又係日本野
8. 你叫佢提早兩個鐘到機場，佢當你冇到，慢吞吞到機場，最後搞到早餐冇時間食，仲要機場狂奔，最後佢話「點知個櫃枱會咁多人姐」
9. 影相永遠都鬆郁矇，我影佢就好靚，但係唔可以話佢影得唔好。
10. 永遠都唔聽人講野，呢頭講完兩個站落車，3秒之後就會有人問邊度落車
11. 死都唔聽人講野，話左扶手電梯企左邊，死要面唔肯企返過嚟（堅持企右邊）話對個扶手電梯唔好。
示意圖片
12. 入園區食野好貴但係怪落我度
13. 明明係佢兩個打鼻鼾，但係怪我成晚轉身副被好嘈搞到佢瞓唔好
14. 管埋你瞓之前同邊個講電話
15. 佢想去個間鋪頭提早關門，然後黑足一晚面，直到買到佢想買既戰利品為止
16. 自己有手唔Google 唔查地圖，有Google translate 但唔開（佢全部都用開），總之指意哂你
17. 佢根本係當你免費導遊+翻譯+工具人，有彈冇讚總之有咩問題入哂你數
18. 朋友圈打卡打得好開心，我諗係滿足曬命心理啦，但係成個trip都係鬧人嘈交
示意圖片
貼文曝光掀起無數網友共鳴，大家紛紛留言：「做好心理準備，一定係做導遊、領隊、翻譯等全部角色」、「每次都係EQ訓練營，呢次去泰國差啲原地爆炸」
