荔枝角停車場「請拍八達通」咁翻譯？ 網民笑爆：香港英文水平跌穿地心

荔枝角華荔邨一個停車場近日成為網絡熱話，原因竟是入口八達通機上一張「騎呢」英文告示！

外國人睇到「黑人問號」​

有港男駕車前往該停車場時，發現告示中文寫着「請拍八達通」，英文竟譯成「Please take a photo of the Octopus」（請拍攝一張八爪魚照片），令他哭笑不得。照片上傳至facebook群組「地板友 Flat Out Club」後，隨即引來網民瘋狂恥笑，直指「香港英文水平跌穿地心」。

資料圖片

​​網民創意改譯

事主在帖文中揶揄：「都係Google嘅錯，我中文差，原來我英文更差，睇咗英文唔知點入場，影張八達通？」從照片可見，停車場入口的八達通機和上方告示箱均貼有同款翻譯錯誤的告示。網民紛紛發揮創意，有人提議正確譯法應為「Please tap your Octopus card」，更有人用港式英語惡搞：「正確係：Please du（嘟）your Octopus card」。

FB圖片

​​網民瘋狂抽水​​：要去街市買八爪魚影相？

事件引發網民熱議，留言區瞬間變成創意大比併：「邊度搵隻章魚嚟？呢個場咁難搞嘅」、「要入返街市搵八爪魚影相先走得」、「影完張八達通要send去邊度先有得入停車場？」更有網民笑言：「大檸樂！入停車場諗住去食嘢啫，而家要先去街市買條八爪魚影相，仲要諗生定死嘅！」

unsplash示意圖

​​翻譯軟件「累街坊」

有網民實測發現，若直接將「請拍八達通」輸入Google翻譯，結果確實顯示「Please take a picture of the Octopus」。有人指出關鍵錯誤在於未設定原文為粵語，正確做法應先選擇粵語，才能譯出「Please tap your Octopus card」。事件亦引發對網上翻譯工具的質疑，網民提醒：「Google翻譯？你真係唔好盡信啊，好多時係得啖笑」、「用Google Translate要反覆互譯先知啱唔啱」。

unsplash示意圖

​​網民嘆：香港英文水平仲衰過菲律賓​​

除了瘋狂抽水，不少網民對香港英語水平下降表示憂慮：「現時港人英語水平好似差過菲律賓」、「國際大都會啲英文搞成咁」、「成間公司無人識英文，都應該識去其他停車場抄啦！」事件反映公共場所的英文翻譯質素參差，隨時令外國遊客「睇到一頭霧水」。

網傳影片，3位大媽在收銀台前上演激烈爭住埋單的場面，手機付款碼準備就緒，個個爭住叫「我嚟！我嚟！」。其中一位看似搶先成功付款，但之後卻有反轉，有眼利的網民更看出當中玄機。

目擊者在社交平台發帖

樓主在社交平台Threads上傳短片並發帖，留言指「真係誇X張，完全目中無人，直接喺我面前表演MMA。我企喺後面好似以為我有防護罩咁，真係呆Ｘ咗」。

大媽搶付藥油錢超激烈：我嚟

影片可見，3位大媽在收銀台前「爭位」，搶住為藥油付款，「得得得得得得」、「唔好唔好唔好」、「我嚟我嚟我嚟」、「呢度呢度」此起彼落。

大媽搶付藥油超激烈：我嚟！當事人帖文截圖圖片

搶先掃碼以為贏晒

然而，看似先掃碼成功的大媽，其實只付了最靠近收銀員的那1盒藥油，其餘5盒較遠的藥油，反被後上的大媽成功搶付。

看似先掃碼成功的師奶，其實只付了最靠近收銀員的那1盒藥油。當事人帖文截圖圖片

她在片中向店員說「唔係唔係，你掃我吖嘛真係」、「後面5支俾我」，最後成為爭埋單的最大贏家。

最後成為爭埋單的最大贏家。當事人帖文截圖圖片

網民看穿：假爭俾錢

不少網民對這種「MMA式」爭付行為感到反感，覺得「阻住後面客人」、「好擾民」，更直言「咁想俾錢，不如叫佢連你份一齊俾晒啦」。

不過眼尖網民則看穿這是「假爭俾錢」，直呼「扮嘢扮到爛」、「假到爆」、「其實個個都不想俾」。有網民一針見血，「十幾二十蚊就爭得要死，幾百蚊就即刻縮」、「小錢爭住俾，大錢就無影」、「試下幾千蚊睇下仲爭唔爭，純粹演戲！」。

眼尖網民則看穿這是「假爭俾錢」，直呼「扮嘢扮到爛」。當事人帖文截圖圖片

小額消費上刻意表現人情味？

有人分析，可能心裡想着「可能兩個都唔想俾之後食飯嗰餐」，於是在小額消費上刻意表現人情味，大額時卻自動退縮。

網民抨擊：其實為咗面子

不少網民抨擊這種文化，「超討厭呢種爭俾錢文化，明明係假慷慨，其實為咗面子！」、「收起嗰啲無謂面子啦」、「撞到樓主咁多下，換成我即刻開口鬧佢哋」、「叫佢哋閃開一邊慢慢打啦，後面好多人排隊」、「我之前試過被5個師奶圍住爭俾錢，爭住買一把指甲鉗，我企定定等佢哋完事」。